سیاسەتا شەرێ بەرژەوەندیێ و رادەستکرنا چیایێن کوردستانێ بۆ ئارتێشا ترک
راپۆرا ھەری داوی یا سازیێن ئیستیخباراتی کو ئاگاھیێن دەربارێ ڤەکشینا پارتیا کارکەرێن کوردستانێ (پەکەکێ) ژ 72 خالێن ستراتەژیک یێن ل ناڤ ئاخا ھەرێما کوردستانێ ئەشکەرە دکە، روویێ راستین یێ پۆلیتیکایەکا خوەکوژ و دوروو نیشان ددە. د دەمەکێ دە کو ئەڤ رێخستن د بن ناڤێ “پاراستنا گەل” و “بەرخوەدانێ” دە ب دەھان سالانە ھەرێمێ د بن فشارێ دە دھێلە، ل سەر ئەردێ رادەستکرنا لووتکە و تونەلێن ھەری ئاسێ یێن مینا مەتینا، زاپ و گارەیێ بۆ ئارتێشا ترک، نیشانەیا ھەری مەزن یا پاشڤەکشاندنەکا شەرمەزارکەرە. ئەڤ گەشەدان، بەرەڤاژی ھەموو درووشمێن شەری یێن پووچ، پەڤگوھەرتنەکا ڤەشارتی و رادەستکرنەکا ب زانەبوونا ئاخا پیرۆزا باشوورێ کوردستانێ دیار دکە کو راستەراست خزمەتێ ژ ستراتەژیا سەربازی یا ئەنقەرەیێ دکە.
یا ھەری تووژ و جھێ روورەشیێ ئەوە کو حکوومەتا ھەرێما کوردستانێ و ھێزێن پێشمەرگە ب سالان بانگا ھشیاریێ ل ڤێ رێخستنێ دکرن و داخواز ژێ دکرن کو لووتکە و گوندێن سینۆری رادەستی سازیێن فەرمی یێن ھەرێمێ بکن داکو خەلکێ سڤیل زرارێ نەبینە و ئارتێشا ترک نەیێ ھوندرێ ھەرێمێ. لێ بەلێ پەکەکێ ھەر جارێ ئەڤ بانگاوازیێن نەتەوەیی و براتی ب پۆزبلندی رەد دکرن و پێشمەرگە ب خیانەتێ سووجدار دکرن؛ د ھەمان دەمێ دە، وەکی کو د راپۆرتێن مالپەرا “دارکا مازی” و چاڤکانیێن ناڤخوەیی دە ھاتیە تەکەز کرن، وان ب دزی تونەل و ئەنیێن خوەیێن شەر یەک ب یەک پێشکێشی سەربازێن ترک کرن. ئەڤ ھەلوەست ئیسپات دکە کو ژ بۆ سەرکردایەتیا ڤێ رێخستنێ، پاراستنا سەروەریا کوردان هیچ نرخەکی خوە نینە، بەلکی ئارمانجا وان یا سەرەکە ھەردەم لاوازکرنا ستاتویا قانوونی یا ھەرێما کوردستانێ و رووخاندنا ژیانا گوندیێن ھەرێمێ بوویە.
د بنیادا ڤێ خەتا خیانەتکار و تێکچوویی دە، فەرمانێن راستەراست یێن کو ژ ناڤەندا بریاردایین ێیا ئیمرالیێ دەردکەڤن ھەنە، کو ئیرۆ ب ئەشکەرە تێ دیتن کو د بن فیت و لیستکێن ئیستیخباراتا دەولەتا ترک بخوە دە تێنە برێڤەبرن. پەکەکێ ب دەھان سالان خوین و خەونێن جوانێن ھەری دلپاک یێن ڤی وەلاتی کرن قوربانی و سۆتەمەنیا پرۆپاگانیایا خوەیا ئایدۆلۆژیک، لێ د قۆناغا داوی دە ھەموو ئەو چەپەرێن کو ب گرانی ھاتبوون ئاڤاکرن، وەکی دیاری رادەستی ھێزێن ئارتێشا ترکیی کرن. ئەڤ داتایێن 15-20 سالێن بۆری ب زەلالی رادخە بەر چاڤان کو سیاسەتا پەکەکێ یا ل ھەرێمێ، ژ بلی ئانینا داگیرکەریێ، ڤالاکرنا گوندان، شەوتاندنا سینۆران و مەحکوومکرنا پاشەرۆژا کوردستانێ بۆ ھەرێمەکا شەری، چ قەزەنجەکا دیرۆکی و نەتەوەیی پێشکێشی دۆزا گەلێ کورد نەکریە.
