مۆندیالا ئەمەریکایێ و کاپتن عەباس، چیرۆکا شۆرەشگەری یا کو ژ قەندیلێ بەر ب مۆندییالا جیھانێ ڤە دچە!
ئەم ھەر رۆژ فێری تشتەکی نوو دبین، لێ خویایە کو کووراھیا زانستێ و پۆلیتیکایێ ل قەندیلێ ژ سینۆرێن ئاقلێ مرۆڤاھیێ دەرکەتیە. ئەندامێ سەرکردایەتیا پەکەکێ دوران کالکان (کو د ناڤ گەل دە وەکی “عەباس” تێ ناسکرن) ڤێ جارێ ب ئانالیزەکا وەھا یا فوتبۆلی-سیاسی دەرکەت پێشبەری کامیرەیان کو ھەر چار پرتووکێن فەلسەفەیێ و ھەموو پرتووکخانەیێن تاکتیکێن فوتبۆلێ ل دویف خوە ھشتن. کالکان ب روویەکی گەلەکی جدی و ئەکادمی راگھاند کو دەولەتا ترک ب سایا “پێڤاژۆیا ئاشتیێ”یا کو وان دابوو دەستپێکرن، فەرسەند دیتیە، پێش کەتیە و گھیشتیە مۆندیالا (کوپایا جیھانێ)یا ل ئامەریکایێ! ئەڤ داخویانی نیشان ددە کو تەئۆریێن “مۆدەرنیتەیا دەمۆکراتیک” ئێدی ل سەر گۆرەپانێن فوتبۆلێ ژی ھاتنە جیبجیکرن و فیفایا ناڤدەولەتی ژی نھا ل بەندا فەرمانێن قەندیلێ یە.
مرۆڤ گاڤا گوھ ددە ڤێ ئانالیزێ، نکارە خوە ژ پرسێن تەکنیکی و کۆمێدی دوور بخە: گەلۆ ئەگەر ھەر تشت ب سایا ڤێ پێڤاژۆیێ روو دابە، وەزیفەیا دوران کالکان د تیما نەتەوەیی یا ترکیێ دە چ بوو؟ ما قەی وی د رۆلا “تەکنیکی” دە ژ شکەستنێن چیایان فیتک لێدخست و دگۆتە یاریزانان “ل گۆری پەرسپەکتیفێن ئیدەۆلۆژیک پاسێ بدن ھەڤ”؟ مرۆڤ دکارە خەیال بکە کو دەما لیستکڤانەکی تیما ترکیێ تۆپ وندا دکر، دوران کالکان ژ ئەکرانێ گازی دکر و دگۆت: “ئەڤ ئەنجاما کێماسیا خوەرەخنەکرنێیە، دڤێ تو بکەڤی پێڤاژۆیا پەروەردەھیا ئەخلاقی!” ب ڤی مەنتقێ، ئەگەر لێدانەکا ھاکان چالھانۆگلو یێ یاریزانێ ترکیێ چووبایە ناڤ گولا تیما بەرامبەر، دا بیتە “پێنگاڤەکە شۆرەشگەری یا بێ وێنە”. چیرۆکا کۆمێدی ل ڤرە کو کالکان ب ڤێ داخویانیێ سەرکەفتنا وەزیفەیا خوە یا چەندین سالان وەکی “سپۆنسەرێ سپۆرت تیڤیێ” ب فەرمی راگەهاند!
لێ پرسیار ھەری مەزن و تراژیدی یا کو گەلێ کورد دپرسە ئەڤە: گەلۆ ئەڤە چ خەسراندن و ڤەگەرە (ئەڤ چ بازرگانیا پووچە)؟ وە ب دەھان سالان خوینا ھەزاران جوانێن ھەری دلپاک رژاند، گوند ڤالا کرن، ھەرێم خستن ناڤ ئاگری، داکو د ئەنجامێ دە ھوون بهێنە بەر کامیرەیان و ببێژن: “مە فەرسەند دا کو ترکیە دەرباسی مۆندیالا ئامەریکایێ ببە”؟ ما کەدا سەدسالان یا ڤی گەلی ژ بۆ وێ بوو کو تیما نەتەوەیی یا ترکیەیێ ل ئامەریکایێ یاریا فۆتبۆلی بکە و ھوون ژی ل سەر لووتکەیێن قەندیلێ چەپکان ژ بۆ وان لیدەن؟ ئەڤ داخویانی نیشانەیا ھەری تووژ یا ئایدۆلۆژیاپەرەستی و ئاسێبوونا ھشمەندییە؛ ھوون ل سەر ئەردێ ھەموو چەپەر، لووتکە و تونەلێن ھەری ئاسێ یێن ل زاپ و مەتینایێ ب دزی رادەستی سەربازێن ترک دکن، د قادا مەدیایێ دە ژی سەرکەفتنێن وان یێن سپۆرتێ دخن ستوویێ خوە!
ئەڤ داخویانیا دوران کالکان ژ بلی کو ببە مژارا قەشمەری و حەنەکێن ل سەر تۆرێن جڤاکی، چ نرخەکی خوەیێ سیاسی و ستراتەژیک نینە. خویایە کو کاپتن عەباس پشتی دەھان سالێن ژییانا د ناڤ شکەفت و دارستانان دە، ئێدی یاریا سیاسەتا گەردوونی لگەل یاریا پلێستێیشنێ تەڤلیھەڤ کریە. دڤێت ھەر دو ئالی ژی باش بفکرن: گەلێ کورد نە تەماشەڤانێ داخویانیێن وەیێن شانۆیییە و نە ژی سۆتەمەنیا حەرکینا خەیالێن وەیێن پووچە. ئەڤ خەیالا مۆندیالێ یا کو وە ب ناڤێ “براتیا گەلان” ھووناندیە، ھەری زێدە وەکی یاریا یاریکەرێ ترکیێ (فیاسکۆ) دەرباسی دیرۆکا کۆمەدیێ دبە.
