پارتیا وەلاتپارێزێن کوردستانێ: دڤێت ترکیە ژ بەر دارڤەکرنا شێخ سەعید لێبۆرینێ ژ گەلێ کوردستانێ بخوازە
نڤێسینگەها راگەھاندنێ یا پارتیا وەلاتپارێزێن کوردستانێ (PWK) ب داخویانیەکا نڤیسکی، رێبەرێ تەڤگەرا نەتەوەیی یا کورد یا سالا 1925ێ شێخ سەعید و 46 ھەڤالێن وی د سالڤەگەرا 101ێ یا دارڤەکرنا وان دە ب رێزداری ب بیر ئانین. PWK د داخویانیا خوە دە ب فەرمی داخواز ژ دەولەتا ترکیەیێ کر کو جھێ مەزەلێن (گۆرێن) ڤان رێبەرێن کورد ئاشکەرە بکە و ژ بەر ڤان سێدارەدانا لێبۆرینێ ژ گەلێ کوردستانێ بخوازە.
د داخویانیێ دە ھات دەستنیشانکرن کو شێخ سەعید و 46 رێھەڤالێن وی د 29ێ خزیرانا 1925ێ دە، ل تاخا دەرێ چیێ یا باژارێ ئامەدێ، ژ ئالیێ دادگەھەکا کۆرسان و ب بنپێکرنا ھەموو رەگەزێن یاسایا ناڤنەتەوەیی ب سزایێ سێدارەدانێ ھاتنە سزادان و دارڤەکرن. PWK بال کشاند سەر وێ یەکێ کو ئەنقەرە پشتی دەرباسبوونا سەدسالەکێ ژی ھێژ فۆبیا مەزەلێن وان دەرباس نەکریە و ب زانەبوون جھێ گۆرا وان ژ رایا گشتی ڤەدشێرە.
پارتیا وەلاتپارێزێن کوردستانێ تەکەز کر کو دۆزا پیرۆزا کو شێخ سەعید و ھەڤالێن خوە ژیانا خوە د رێیا وێ دە فەدا کرنە، ئیرۆ ب شەھادەتا سەدھەزارێن دن و ب تێکۆشینەکا وەلاتپەروەرانە ل ھەر چار پەرچەیێن کوردستانێ بەردەوام دکە. د داخویانیێ دە ھات دیارکرن کو رحا شەھیدان تەنێ ب دەستخستنا ستاتویێن سیاسی، نەتەوەیی و جۆگرافی یێن ل پەرچەیێن کوردستانێ شاد دبە و ئیرۆ زێدەتری 70 میلیۆن کورد ل جیھانێ ل بەندا ئازادی و سەرخوەبوونا کوردستانێ نە.
د پشکا داوی یا داخویانیێ دە، پارتیا وەلاتپارێزێن کوردستانێ ل گەل شێخ سەعید، ناڤێن پێشەنگێن مینا خالد بەگێ جبری، یوسوف زیا بەگ، عەلی رزا بەگ، بەهائەدین بەگ، فایق بەگ، مەلا عەڤدڕەحمانێ شرنەخی، در. فوئاد و ب دەھان ھەزار کوردێن کو د دەما سەرھلدانا 1925ێ و سالێن پەی وێ دە ژ ئالیێ ئارتێشا ترک ڤە ھاتنە کوشتن، ب رێزداری ب بیر ئانین و سۆزا دلسۆزیا لگەل میراتەیا وان یا دیرۆکی نوو کر.
