شامیل تەیار: دەمیرتاش خوە رەخنە کریە و داخوازا بەشداریا د رێڤەبەریێ دە دکە
رۆژنامەڤان و پارلەمەنتەرێ بەرێ یێ پارتیا داد و گەشەپێدانێ (ئاکەپێ) شامیل تەیار، دەربارێ ھەڤسەرۆکێ گشتی یێ بەرێ یێ ھەدەپێ سەلاحەدین دەمیرتاش دە کو د گرتیگەھا ئەدرنەیێ دەیە، ئیدیعایەکا نوو و سیاسی یا گرنگ ئاڤێت رۆژەڤێ. تەیار ئیدیعا کر کو د ڤێ دەما داوی دە کەسایەتەکی ناسکری سەردانا دەمیرتاش کریە و د ڤێ ھەڤدیتنا درێژ دە، دەمیرتاش نێزیکاتیێن خوەیێن سیاسی یێن بۆری خستیە بن رەخنەیەکا کوور.
ل گۆری ئیدیعایا تەیار، سەرلاحەدین دەمیرتاش د ڤێ ھەڤدیتنێ دە شاشیتیێن ئەنیا ئۆپۆزیسیۆنێ یا بۆری قەبوول کریە و وەھا گۆتیە: “مە بەرێ ھندەک شاشیتی کرن و مە ھەموو حەسابێن خوە تەنێ ل سەر ونداکرنا سەرۆککۆمار ئەردۆگان و کەتنا وی یا ژ دەستھلاتێ ئاڤا کر. لێ بەلێ ل گۆری شەرت و مەرجان، گەرەک مە د ھندەک مژاران دە بەدەل دابانە؛ رەدکرنا مە یا ب تەمامی خەلەتیەک بوو. نھا دڤێت ئەم ئاڤاھیەکا سیاسی یا نوو ئاڤا بکن، بەشداری رێڤەبەریێ ببن و پرسگرێکان پێکڤە چارەسەر بکین.”
شامیل تەیار د نرخاندنا خوە یا ل سەر ڤان داخویانیان دە دەستنیشان کر کو ئەشکەرەیە دەمیرتاش ھێڤی دکە کو د دەمەکێ نێزیک دە وەرە بەردان و ئێدی ئارمانجا وی نە تەنێ مایینا د ئەنیا ئۆپۆزسیۆنێ دەیە، بەلکی دخوازە راستەراست ببە بەشەک ژ دەستھلاتێ. تەیار بال کشاند سەر وێ یەکێ کو دەمیرتاش د وێ باوەریێ دەیە کو ئەو دێ ژ سیاسیێن کەمالیست ھێسانتر بگھیژە رێکەفتنەکێ و ھەر چەند نە دیار بە کو ئەڤ دیزاینا نوو دێ وی ببە ناڤ ھەڤپەیمانیا جومھور یان نا، سەرکەفتنا پێڤاژۆیەکا نوویا ئاشتیێ دێ ببە سەدەما ھەڤکاریێن نوویێن پۆلیتیک.
د قۆناغا داوی یا نرخاندنا خوە دە، تەیار رەوشا ھەری داوی یا سیاسەتا ترکیەیێ کورتە-ئانالیز کر و دیار کر کو د دەمەکێ دە کو پارتیا گەل یا کۆماری (جەهەپێ) د ناڤ کریزێن خوەیێن ناڤخوەیی دە بەر ب ھلوەشینێ ڤە دچە، ل ئالیێن جودا پۆلیتیکایێن بنیادی یێن ژ بۆ سەردەما نوو تێن پێشخستن و ل ھەرێمێ سەردەمەکا دینامیک و نوو یا پۆلیتیک دەست پێ دکە.
