سەرۆککۆمارێ ئیرانێ و سەرۆکێ ھەرێما کوردستانێ ل تەھرانێ جڤیان
سەرۆککۆمارێ ئیرانێ مەسعوود پزیشکیان و سەرۆکێ ھەرێما کوردستانێ نێچیرڤان بارزانی ل تەھرانا پایتەختا ئیرانێ جڤیان. د ھەڤدیتنێ دە ھەر دو ئالیان ل سەر بەرفرەھکرنا ھەڤکاریێن ئابۆری، چاندی و پاراستنا ئارامیا ناڤچەیێ ل ھەڤ کر.
سەرۆککۆمارێ ئیرانێ مەسعوود پزیشکیان پشتی جڤینێ پەیامەک بەلاڤ کر و راگھاند کو وەلاتێ وی ئامادەیە ھەڤکاریێن خوەیێن لگەل ھەرێما کوردستانێ د چارچۆڤەیا بەرژەوەندیێن ھەڤبەش دە پێش بخە. پزیشکیان دەستنیشان کر کو دڤێت وەلاتێن ناڤچەیێ ژ بۆ خورتکرنا ئاشتی و ئەولەھیا بەردەوام ھەول بدن و گۆت:
“ئیران نە ل دوو ئالۆزی و ناکۆکیانە؛ بپێشخستنا ھەڤکاری و کوورکرنا پێوەندیێن لگەل وەلاتێن ھەرێمێ ژ بۆ مە ستراتەژیەکا سەرەکی یە.”
پزیشکیان ھەر وەھا ئامادەھیا تەھرانێ یا ژ بۆ خورتکرنا تێکلیێن د وارێن زانستی، پەروەردەھی، چاندی، ئابۆری و بازرگانیێ دا لگەل ھەرێما کوردستانێ نیشان دا.
سەرۆکێ ھەرێما کوردستانێ نێچیرڤان بارزانی، کو ب ڤەخوەندنەکا فەرمی ژ بۆ بەشداربوونا مەراسیما فەرمی سەردانا تەھرانێ کربوو، ل سەر حەسابا خوە یا تۆرا جڤاکی “X” دەربارێ ناڤەرۆکا ھەڤدیتنێ دا زانیاری پارڤە کرن. بارزانی دیار کر کو وان ل سەر رێیێن خورتکرنا تێکلیێن ئیراق و ھەرێما کوردستانێ یێن لگەل ئیرانێ دانوستاندن کرنە و تەکەزی ل سەر بەرفرەھکرنا ھەڤکاریێن ئابۆری و پاراستنا پێوەندیێن دیرۆکی و جیرانتیێ کریە.
د داخویانیا فەرمی یا سەرۆکاتیا ھەرێما کوردستانێ دا ژی ھات راگھاندن کو ھەر دو ئالیان گرینگیەکا مەزن دانە پاراستنا ئەولەھیا ناڤچەیێ و چارەسەرکرنا ئالۆزیان ب رێیا دیالۆگێ. ھەر وھا، ئالیان ھێڤی خوەست کو بداویھاتنا شەر و بەردەوامیا دانوستاندنێن د ناڤبەرا ئیران و ئامەریکایێ دە ببە سەدەما ئاشتی و ئارامیەکا ماییندە ل ھەرێمێ.
ھێژایی گۆتنێیە کو سەرۆکێ ھەرێما کوردستانێ نێچیرڤان بارزانی د چارچۆڤەیا سەردانا خوەیا تەھرانێ دا، ژ بلی سەرۆککۆمار، لگەل وەزیرێ کارێن دەرڤەیێ ئیرانێ عەباس ئیراقچی و سەرۆکێ پارلامەنتۆیا ئیرانێ محەمەد باقر قالیباف ژی جڤینێن جودا پێک ئانین.
