رەوانگەھا سووری بۆ مافێن مرۆڤان: ل گوندەوارێ رەقایێ 10 جوانێن کورد ھاتن گرتن

رەوانگەھا سووری بۆ مافێن مرۆڤان (SOHR) راگھاند کو ھێزێن ئەولەھیێ یێن سەر ب “حکوومەتا ڤەگوھێز” ڤە، ل گوندەوارێ رەقایێ ھەری کێم 10 جوانێن کورد بنچاڤ کرنە و بەر ب جھەکی نەناس ڤە برنە.

ل گۆری زانیاریێن کو سۆھرێ پارڤە کرنە، روودان ئیرۆ 4ێ تیرمەھێ ل خالەکا کۆنترۆلێ یا باژارۆکێ کەرامێ یێ ل گوندەوارێ رەقایێ پێک ھاتیە. ھات راگھاندن کو جوانێن ھاتنە گرتن ژ ھەرێما عەفرینێ نە و د دەما روودانێ دە لگەل مالباتێن خوە د رێ دا بوون دا کو بچن پارێزگەھا حەسەکێ.

رەوانگەھا سووری بۆ مافێن مرۆڤان دەستنیشان کر کو ھێزێن ل خالا کۆنترۆلێ تەنێ جوان بنچاڤ کرنە و دەست نەدانە ژنێن لگەل وان، لێ بەلێ ڤێ کریارێ ترس و نیگەرانیەکا مەزن د ناڤ مالباتان دە چێکریە. ھەتا نھا سەدەم و جھێ گرتنا ڤان کەسان ژ ئالیێ رایەداران ڤە نەھاتیە ئاشکەرەکرن.

بانگا مالباتان و زێدەبوونا زەختان

پشتی روودانێ، مالباتێن جوانێن بنچاڤکری بانگ ل سازیێن مافێن مرۆڤان و ئالیێن پەیوەندیدار کرن کو ژ بۆ ئاشکەرەکرنا چارەنووسا زارۆکێن وان و ئازادکرنا وان یا بلەز بکەڤن ناڤ تەڤگەرێ.

ئەڤ ئۆپەراسیۆن د دەمەکێ دە تێ کو بەریا چەند رۆژان (د 1ێ تیرمەھێ دە) ھێزێن ئەولەھیێ ئۆپەراسیۆنەکا مینا ڤێ ل باژارۆکێن کوردنشین یێن تل ئەران و تل حاسلێ یێن ل گوندەوارێ حەلەبێ ئەنجام دابوو و ل ور ژی 10 جوان ھاتبوون گرتن.

رەوانگەھا سووری بۆ مافێن مرۆڤان (SOHR) بالێ دکشینە سەر ڤان بوویەرێن داوی و ھشیاریێ ددە کو بنچاڤکرنێن ل پەی ھەڤ، نیشانەیا زێدەبوونا زەخت و پێنگاڤێن سیستەماتیکن ل دژی پێکھاتەیا کورد یا ل وان ھەرێمان.