مالباتا شێخ حەنان سالڤەگەرا 14ێ یا کارەساتا عەفرینێ ب بیر تینە و بانگا دادوەریێ دکە
مالباتا کەسایەتێ ناسکری یێ عەفرینێ، شێخ حەنان شێخ حەسەن، د سالڤەگەرا 14ێ یا کارەساتا کو ب سەرێ وان دا ھاتبوو، داخویانیەک بەلاڤ کر. مالباتێ د داخویانیا خوە دا داخوازا دادگەھکرن و سزادانا بەرپرسێن ڤێ بوویەرێ کر.
د داخویانیێ دا ھات دیارکرن کو بەریا 14 سالان، د ئەنجاما ئێریشەکا ھێزێن یەکیتیا دەمۆکراتیک (پەیەدێ) دا، شێخ حەنان شێخ حەسەن و دو کورێن وی یێن ب ناڤێن عەبدولرەحمان و نوورەدین ژیانا خوە ژ دەست دانە. ھات دەستنیشانکرن کو یەک ژ کورێن وی د بن ئەشکەنجەیێ دا ھاتیە شەھیدکرن.
ل گۆری داخویانیا مالباتێ، ئەڤ روودان د چارچۆڤەیا پێلەکا “تەرۆرا سیاسی” دە پێک ھاتیە. د داخویانیێ دە ھات گۆتن کو ئەڤ ئێریش ب مەبەستا ئارمانجگرتنا کەسایەت و ئالیێن سیاسی یێن ئۆپۆزیسیۆنێ، ب تایبەتی یێن کو ل سەر رێبازا مستەفا بارزانی و سەر ب پارتیا دەمۆکراتا کوردستان – سووریا (پەدەکە-سێ) نە، ھاتیە ئەنجامدان.
مالباتێ د بەردەوامیا داخویانیا خوە دە بال کشاند سەر رۆلا سەرۆک مەسعوود بارزانی و دەستنیشان کر کو د وێ سەردەمێ دا ژ بۆ 11 ئەندامێن مالباتێ بریارا بدارڤەکرنێ (سێدارەدانێ) ھاتبوو دەرخستن. مالباتێ دا زانین کو ب دەستوەردان و ھەولدانێن سەرۆک بارزانی رێ ل بەر کارەساتەکا هێژ مەزنتر و بەرفرەھبوونا کۆمکوژیێ ھاتبوو گرتن.
د داویا داخویانیێ دە، مالباتا شێخ حەنان بانگ ل ھەموو ئالیێن پەیوەندیدار، سازیێن یاسایی و رێخستنێن مافێن مرۆڤان یێن ناڤخوەیی و ناڤدەولەتی کر کو ئەرکا خوە یا یاسایی ب جھ بینن. مالباتێ داخواز کر کو لێکۆلینەکا ھوور و دادپەروەر بهێت کرن دا کو تاوانبار و بەرپرسێن ڤێ بوویەرێ ل پێشبەری دادگەھێ بێن سزادان.
