حەسەکێ: کۆچبەرێن سەرێ کانیێ داکەتن کۆلانان و داخوازا ڤەگەرەکا ئەولەھ کرن
کۆچبەرێن باژارێ سەرێ کانیێ یێن کو ژ بەر شەر و پەڤچوونان ژ جی و وارێن خوە بوونە، خوەپێشاندانەکا بەرفرەھ ل پێش ئاڤاھیا پارێزگەھا حەسەکێ ل دار خستن. وەلاتیێن دەربدەربوویی د ڤێ چالاکیێ دە داخوازا دابینکرنا مافێن خوەیێن رەوا و ڤەگەرەکا ئەولەھ و بروومەت بۆ سەر خاکا خوە کرن.
د خوەپێشاندانا کو ئیرۆ 5ێ تیرمەھا 2026ێ ھات برێڤەبرن دا، کۆچبەران بانگ ل جڤاکا ناڤدەولەتی و ئالیێن پەیوەندیدار کرن کو کەشوھەوایەکی گونجاو و رێیەکا ئەولەھ ژ بۆ وان بهێت پەیداکرن دا کو کاربن داوی ل ژیانا دەربدەریێ بینن و ڤەگەرن سەر مال و ملکێن خوە. خوەپێشاندەران بال کشاند سەر وێ یەکێ کو شەرت و مەرجێن ژیانێ د ناڤ کامپێن نشتەجیبوونێ دا گەلەکی خەراب و دژوارە، و ئێدی تەحەمولا وان ل ھەمبەری ڤێ داخوازا مرۆڤی نەمایە.
د دەما خوەپێشاندانێ دە، وەلاتیان چەندین درووشم و پانکارتێن کو ئێش و داخوازێن وان نیشان ددن بلند کرن. د ناڤ درووشمێن سەرەکی یێن کۆچبەران دە ئەڤ داخواز دەرکەتن پێش:
“بەسە کۆچبەری.”
“ھەتا کەنگی ڤەگەر دێ هێت پاشخستن؟”
“ژ مافێ مەیە ئەم ل مالێن خوە بژین، نە ل کامپان.”
“سالێن دەربدەریێ تەمەنێ مە دزی، ھوون ژی مافێن مەیێن ڤەگەرێ نەدزن.”
چالاکڤانێن مافێن مرۆڤان ل ھەرێمێ تەکەز دکن کو دۆزا کۆچبەرێن سەرێ کانیێ پێویستی ب چارەسەریەکا سیاسی و ئەولەھی یا بلەز ھەیە، دا کو ئەڤ مالباتێن کو ب سالانە د بن کۆنێن کامپان دا رووبەروویی سەرما و گەرمایێ دبن، بگهن مافێ خوەیێ ھەری سرووشتی کو ئەو ژی ژیانا ل سەر خاکا باب و کالێن وانە.
