ل دیاربەکرێ ژ بۆ سەربەستبەردانا ئەندامێن تەڤگەرا ڤەژینێ چالاکیا روونشتنێ ھات لدارخستن
تەڤگەرا ڤەژینا کوردستانێ، ل بەر دەرێ مزگەفتا مەزنا دیرۆکی یا ناڤچەیا سوورێ یا دیاربەکرێ، ژ بۆ ئەندامێن خوە فەرید ئازاد و فایق تەیران چالاکیا روونشتنێ لدار خست. د چالاکیێ دا کو ب پانکارتان ھات برێڤەبرن، داخواز ھات کرن کو ھەر دو ئەندامێن تەڤگەرێ یێن کو ژ 10ێ خزیرانێ ڤە گرتی نە، د زووترین دەم دە سەربەست بهێن بەردان.
ل گۆری زانیاریێن کو ھاتنە پارڤەکرن، فەرید ئازاد و فایق تەیران د 10ێ خزیرانێ دە پشتی کو ژ بنچاڤکرنێ سەربەست ھاتبوون بەردان، ل بەر دەرێ دادگەھا دیاربەکرێ جارەکا دن ژ ئالیێ پۆلیسان ڤە ھاتن بنچاڤکرن.
ھات راگھاندن کو ھەر دو ئەندامێن تەڤگەرێ دەما کو خوەستنە نووچەیا سەربەستبەردانا خوە ب رێیا تەلەفۆنێ لگەل مالباتێن خوە پارڤە بکن، ژ ئالیێ ھێزێن ئەولەھیێ ڤە ھاتنە دەستەسەرکرن. پۆلیسان ئیددیعا کریە کو وان ب تەلەفۆنێ وێنە و ڤیدیۆیێن ئاڤاھیا دادگەھێ کشاندنە. ھەر وەھا ھات دیارکرن کو د دەما بنچاڤکرنێ دە، ل ھەمبەری ئاخافتنا ب زمانێ کوردی یا فەرید ئازاد نێزیکاتیەکا نەگونجاو و سڤکاتی ھاتیە کرن.
گرێدایی مژارێ، یاساناسان بال کشاند سەر ھنجەتا بنچاڤکرنێ و دیار کرن کو ل بەر دەرێ دادگەھا دیاربەکرێ رۆژانە گەلەک جاران تەلەفۆن تێن بکارئانین، وێنە تێن کشاندن و داخویانیێن چاپەمەنیێ تێن دایین. ژ بەر ڤێ یەکێ، یاساناس دەستنیشان دکن کو ئیددیعایێن پۆلیسان یێن ژ بۆ بنچاڤکرنێ ژ راستیێ دوورن.
تێ زانین، فەرید ئازاد ب ھەلوەستا خوەیا خوەدیلێدەرکەتنا ل زمانێ کوردی و رەدکرنا لەشکەریێ تێ ناسین و بەری نھا ژی ژ بەر پارڤەکرنێن خوەیێن ل سەر مەدیایا جڤاکی یێن دەربارێ ڤان مژاران دە ھاتبوو بنچاڤکرن.
