لێکۆلەر و دیرۆکناس سەدات ئولوگانا ئەشکەرە کر کو وێنەیێن بدارڤەکرنا سەید رزا، کورێ وی و 5 رێھەڤالێن وی پشتی 89 سالان ھاتنە دیتن.
ئەو پێشەنگێن دێرسمێ ل سالا 1937ان ھاتبوون بدارڤەکرن.
سەدات ئولوگانا ل سەر ھەسابێ خوەیێ Xێ داخویانیەک بەلاڤ کر.
ئولوگانا دیتنا ڤان وێنەیان وەکی “تۆلھلدانا دارڤهكرنهكه نهیاسایی” نرخاند.
دیرۆکناسێ کورد ئانی زمان: “بەریا 89 سالان سەیید رزا، کورێ وی و 5 پێشەنگێن دێرسمی ب دار ڤە کرن.”
ئولوگانا دیار کر کو دەولەتێ نەخوەستیە چ دیمەنێن بیرگەھێ بھێلە و وێنە ژ ھۆلێ راکرنە و دەستنیشان کر:
“پشتی 89 سالان دیمەنێن بیرگەھێ دەرکەتن ھۆلێ و تۆلڤهكرنا دارڤهكرنهكا نهیاسایی ھات ستاندن.”
بەلگەیا ھەری مەزن گۆرەیەکە
ئولوگانا د بەردەوامیا پەیاما خوە دە بال کشاند سەر ھوورگلیێن کو د وێنەیان دە دەرکەتنە پێش.
ل گۆری گۆتنێن وی، د وێنەیان دە پێلاڤ ژ پێیێن وان کەتنە و گۆرەیێن وان یێن ریس و ب نەخش خویا دکن.
سەدات ئولوگانا ئەو وێنە وھا شیرۆڤە کرن: “دەما مرۆڤ تێ بدارڤەکرن، گرانی ژ لاش دکشە و لاش سست دبە، پێشی پێلاڤ دکەڤن.
کەس ڤێ یەکێ پلان ناکە. کەس ڤێ نایینە بیرا خوە. لێ د وێنەیان دە دمینە.”
ئولوگانا ھەر وھا دا زانین کو ژنێن دێرسمێ ئەو گۆرەیێن ھرییێن ب نەخش د شەڤێن زڤستانێ دە ب دەستێن خوە ھوونابوون و بلاند:
“دبە کو زڤستانا بۆری، دبە کو زڤستانا بەریا وێ… وان ژنان ژ ترسا سەرمایێ و درێژیا رێ ئەو گۆرە چێکربوون.”
“چاڤ دچن سەر پێیان”
ئولوگانا بال کشاند سەر ھەستیاریا وێنەیان و خوە لێ بەردا: “وان دەستان نزانبوو کو ئەو پێ دێ د سێدارێ دە بلڤن.
وێنەیێن بدارڤەکرنێ ب پرانی روویان دکشینن. لێ د ڤان وێنەیان دە چاڤ دچن ژێر، دچن سەر پێیان و ل سەر گۆرەیەکێ دسەکنن.”
وی پەیاما خوە ب ڤان گۆتنان ب داوی کر: “گۆرەیا ب نەخش ھین ژی مایە. رھ ژ لاش دەرکەتیە، ناڤ ھاتیە ژێبرن لێ ئەو گۆرە سەکنیە. رەنگێ دێرسمێ و گەرماھیا دەستێ کو ئەو ھوونایە ھلگرتیە.
ئەم دیرۆکناس بەلگەیان دخوینن لێ جارنان بەلگە گۆرەیەکە. ئەو گۆرە تشتەکی وسا دبێژە کو ت ئارشیڤ نکارە ببێژە: ل ڤر مرۆڤەک ھەبوو. ژێ ھاتبوو ھەزکرن. ترسیابوون کو سەرما بدیێ.”
15ێ چریا پاشینا 1937ان
سەیید رزا و رێھەڤالێن وی 15ێ چریا پاشین یا 1937ان ل باکورێ کوردستانێ ژ ئالیێ دەولەتا ترکیەیێ ڤە ھاتن بدارڤەکرن.
