پەدەکە: مەدالیایا ئیتالیایێ نیشانا پێگەھا بھێزا نێچیرڤان بارزانییە
دەستەیا کارگێری یا مەکتەبا سیاسی یا پارتیا دەمۆکراتا کوردستانێ (پەدەکێ)، ب بۆنەیا وەرگرتنا مەدالیایا ھەری بلندا رێزلێنانا سڤیل یا کۆمارا ئیتالیایێ، پەیامەکا پیرۆزباھیێ ئاراستەی ل سەرۆکێ ھەرێما کوردستانێ نێچیرڤان بارزانی کر.
مەکتەبا سیاسییا پەدەکێ د داخویانیا خوەیا فەرمی دە کو ئیرۆ، 9ێ تیرمەھا 2026ێ، بەلاڤ کریە، راگھاند:
“ب بۆنەیا پێشکێشکرنا مەدالیایا ھەری بلندا رێزلێنانا سڤیل یا کۆمارا ئیتالیایێ بۆ سەرۆک نێچیرڤان بارزانی، ئەم پیرۆزباھیێن خوەیێن ھەری گەرم ل جەنابێ وی و گەلێ کوردستانێ دکن.”
د پەیاما پارتیێ دە ھاتە دەستنیشانکرن کو خەلاتکرنا سەرۆکێ ھەرێما کوردستانێ ب خەلاتەکا وھا یا ناڤدەولەتی، نیشانەکا بەرچاڤا پێگەھا وی یا گرنگ و باندۆرا وی یا بھێزە، چ د ئاستا ناڤخوەیی دا و چ ژی د قادا ناڤدەولەتی دا.
پەدەکێ بال کشاند سەر گرنگیا ڤێ خەلاتێ و دیار کر کو ئەڤ پێنگاڤ ئەنجاما ھەولدانێن بەردەوام یێن نێچیرڤان بارزانییە د وارێن، بھێزکرنا دیپلۆماسیا ھەرێما کوردستانێ و خورتکرنا پەیوەندیێن لگەل وەلاتێن جیھانێ و پاراستنا نرخێن ھەڤبەش و گەشەپێدانا چاندا پێکڤەژیانا ئاشتیانە یا د ناڤبەرا پێکھاتەیان دا.
مەکتەبا سیاسی یا پەدەکێ د داویا داخویانیا خوە دە کێفخوەشیا خوە ب ڤێ سەرکەفتنا دیپلۆماتیک ئانی زمان و ھێڤیا بەردەوامی و سەرکەفتنێ ژ بۆ ئەزموون و قۆناغا سیاسی یا ھەرێما کوردستانێ خواست.
