پارتییا وەلاتپارێزێن کوردستانێ: ئەم عەلیشێر بەگ و زەریفە خانمێ ب رێزداری ب بیر تینن
نڤێسینگەها راگەھاندنێ یا پارتییا وەلاتپارێزێن کوردستانێ (PWK)، ب بۆنەیا سالڤەگەرا 89ێ یا قەتلکرنا سەرۆک و رێبەرێ نەتەوەیی یێ تەڤگەرا نەتەوەیی یا کورد یا کۆچگرییێ، عەلیشێر بەگ و ھەڤژینا وی زەریفە خانمێ، پەیامەکا بیرئانینێ بەلاڤ کر.
PWKێ د داخویانیا خوەیا فەرمی دا کو ئیرۆ، 9ێ تیرمەھا 2026ێ، ھاتە وەشاندن، بال کشاند سەر بەرخوەدانا دیرۆکی یا ھەر دو رێبەرێن کورد و وھا گۆت:
“سەرۆکێ تەڤگەرا نەتەوەیی یا کورد یا کۆچگرییێ عەلیشێر بەگ و زەریفە خانم، ھەڤژینا وی یا تێکۆشەر و کادرۆیا رێبەرا تەڤگەرێ، پشتی شکەستخوارنا تەڤگەرا کۆچگرییێ، تەسلیمی دەولەتا ترکییەیێ نەبوون و ب سالان ل چییایێن دێرسمێ ژییان.”
“ب خیانەتێ ھاتن شەھیدکرن و جھێ تەرمێن وان وندایە”
د پەیاما PWKێ دا ھاتە ببیرخستن کو دەولەتا ترکییەیێ د دەما ئامادەکارییێن جینۆسایدا بەرفرەھا ل دێرسمێ دا، وەکە گاڤا یەکەم ھەر دو رێبەر کرنە ئارمانج. داخویانیێ ب ڤی رەنگی بەحسا ھوورگلیێن بوویەرێ کر: کەسەکی ب ناڤێ زەینەلێ کو کریڤێ عەلیشێر بەگ و سیخورێ دەولەتێ بوو، د 9ێ تیرمەھا 1937ێ دا ئەڤ خیانەتە ئەنجامدا، عەلیشێر بەگ و زەریفە خانم ب دەستێ ڤی سیخوری ھاتن شەھیدکرن و سەرێ وان ھاتن ژێکرن دا کو رادەستی رایەدارێن دەولەتێ بکن.
د داخویانیێ دە ھاتە دەستنیشانکرن کو تەڤی دەرباسبوونا 89 سالان ژی، ھەتا رۆژا ئیرۆ جھێ گۆر یان ژی تەرمێن عەلیشێر بەگ و زەریفە خانمێ نایێ زانین.
نڤێسینگەها راگەھاندنێ یا پارتییا وەلاتپارێزێن کوردستانێ د داویا پەیاما خوە دە رێزداریا خوە ژ بۆ بیرئانینا وان نیشان دا و گۆت: “ئەم د سالڤەگەرا 89ێ یا شەھادەتا وان دا، عەلیشێر بەگ، زەریفە خانمێ و ھەموو شەھیدێن کوردستانێ ب گرامی و روومەت ببیر تینن.”
