پشتی پێڤاژۆیا ئاشتیێ 219 ئەندامێن پەکەکێ چەک دانین
وەزیرێ ناڤخوەیێ ترکیەیێ مستەفا چیفتچی ئامارێن فەرمی یێن سالەکێ یێن پشتی پێڤاژۆیا نوویا ئاشتیێ و بریارا چەکدانینێ یا پەکەکێ ئەشکەرە کرن. چیفتچی راگھاند کو د دەما سالەکێ دا 219 چەکدارێن پەکەکێ ب رێیا دانوستاندن و رازیکرنێ چەکێن خوە دانینە و خوە رادەستی ھێزێن ئەولەھیێ کرنە.
وەزیرێ ناڤخوە یێ ترکیێ مستەفا چیفتچی، ئیرۆ (پێنجشەم، 9ێ تیرمەھا 2026ێ) د بەرنامەیەکا زندی یا تەلەڤزیۆنەکا ترکیەیی دا نرخاندن بۆ پێشکەفتنێن داویێ یێن وەلات کر. چیفتچی دەستنیشان کر کو قۆناغا “ترکیەیا بێتەرۆر” ب رەنگەکی سەرکەفتی بەردەوامە و گۆت:
“ژ 12ێ گولانا 2025ێ ڤە، دەما کو کۆمێن گرێدایی پەکەکێ بریارا چەکدانینێ دان، ھەتا نھا 219 ئەندام ب رێیا گوفتوگۆ و رازیکرنێ ڤەگەریانە و خوە رادەستی دەولەتێ کرنە.”
ئەڤ داخویانیا وەزیرێ ناڤخوە، وەکی یەکەم ئامارا فەرمی یا دەولەتا ترکیەیێ تێ حەسباندن کو ئەنجامێن سەربازی و ئەولەھیێ یێن پشتی بریارا چەکدانینێ یا سالا بۆری (گولان 2025) نیشان ددە.
وەزیرێ ناڤخوە یێ ترکیەیێ ئەشکەرە کر کو ژ بەر بنەجھبوون و سەپاندنا ئارامیا ل ھەرێمێ، وی فەرمان دایە کو ئەو خالێن پشکنینێ و ئەولەھیێ یێن کو ئێدی پێدڤی پێ نەمایە، یەک ب یەک بێن راکرن.
چیفتچی وەکی نموونە بەحسا راکرنا خالەکا کۆنترۆلێ یا گرنگ ل سینۆرێ قەزایا شەمزینانێ کر و تەکەز کر کو ئەڤ بریارە نە گرێدایی ناتۆیێیە؛ تەنێ بریارەکا ناڤخوەیی یا وەزارەتا وانە دا کو ھاتن و چوونا وەلاتیێن ھەرێمێ ھێسانتر ببە.
مستەفا چیفتچی ل سەر رەوشا نوویا دەڤەرێن سینۆری وھا ئاخڤی: “ئەم ل ڤر بەحسا بداویھاتنا قەید و زنجیرەکا 50 سالی دکن. بھێزبوونا رەوشا ئەولەھیێ رێ ل بەر گەشبوونا چالاکیێن چاندی، وەرزشی و گەشتیاریێ ڤەکریە. چێکرنا فەستیڤال و شاھیێن کو بەرێ ژ بەر شەر و ئالۆزیان وەکی ‘خەون’ دھاتن دیتن، ئیرۆ ل ڤان ھەرێمان دبن راستی.”
پێڤاژۆیا نوویا ئاشتیێ ل ترکیەیێ پشتی دەستپێشخەریا سەرۆکێ پارتیا تەڤگەرا نەتەوەپەرەست (مەھەپێ) دەولەت باخچەلی یا د 26ێ مژدارا 2024ێ دا دەست پێ کربوو.
پێنگاڤا ھەری مەزن و قولپەکی گرنگ د ناڤا رۆژێن 5-7ێ گولانا 2025ێ دا ھات ئاڤێتن؛ گاڤا کو پەکەکێ د کۆنگرەیا خوەیا 12ێ دا ب فەرمی بریارا بداویانینا خەباتا چەکداری و خوەھلوەشاندنێ دا. وەزیرێ ناڤخوە د داویا ئاخافتنا خوە دە تەکەز کر کو وەزارەتا وان ب ھوورگلی چاڤدێریا ڤێ پێڤاژۆیێ دکە و ژ بۆ دابینکرنا ئەولەھی، ئابۆری و گەشتیاریا ھەرێمێ پێنگاڤێن ھین مەزنتر د رۆژەڤێ دا نە.
