پارلامەنتۆیا ئەورۆپایێ ل سەر داخوازا جوانێن کورد ژ بۆ رۆژئاڤا کەت تەڤگەرێ
د دەمەکێ دا کو سیبەرا شەری و مەترسیا کۆچبەریێ ل سەر تاخێن کوردی یێن باژارێ حەلەبێ و ھەرێمێن رۆژئاڤایێ کوردستانێ زێدە ببوو، دەستپێشخەریا مرۆڤی و یاسایی یا جوانێن کورد ل ئەورۆپایێ بوو پرەکا گرنگ ژ بۆ گھاندنا دەنگێ گەلێ کورد بەر ب ناڤەندێن بریاردانا جیھانی ڤە. کۆمەکا جوانێن دلسۆز یێن رەڤەندا کوردستانی ل ئالمانیایێ، ب بەرھەڤکرنا بەلگەیێن تاوانان ل دەریێ پارلامەنتۆیا ئەورۆپایێ دان و پشتی ھەولدانێن بەردەوام بەرسڤەکا فەرمی و خورت وەرگرتن.
د دەستپێکا سالا 2026ێ دا، رەوشا مرۆڤی ل تاخێن شێخ مەقسوود و ئەشرەفیێ یێن حەلەبێ گھیشتبوو ئاستەکێ کارەساتبار. ئێریشێن ئارتێشا سووریەیێ یێن ب چەکێن گران و فرۆکەیێن بێفرۆکەڤان (درۆنە)، بووبوون سەدەما کۆچبەربوونا نێزیکی 155 ھەزار کەسان کو پرانیا وان ژن، زارۆک و کال و پیر بوون. د ھەمان دەمێ دا، نەخوەشخانەیا شەھید خالد فەجر کو یەکانە ناڤەندا تەندورستیێ یا دەڤەرێ بوو ژ بەر بۆمبەبارانێ ژ خزمەتێ دەرکەت و مەترسیا پاقژیا ئەتنیکی و گوھەرتنا دەمۆگرافیک ل دژی کوردان دەرکەتە ئاستەکێ بلند.
ل ھەمبەری ڤێ رەوشێ، فەدەراسیۆنا جوانێن رەڤەندا کوردستانی ل ئالمانیایێ د 12ێ چلەیا 2026ێ دا جڤینەکا لەزگین پێک ئانی. د بن سەرپەرەشتیا شاھان عۆمەر فارس و ب بەشداریا چالاکڤانان؛ در. ڤیان خەلیل، لوانا عەفاف حەجی شێخمووس، یاسەمین موراد و دلژین باخستانی، بریار ھاتە دان کو ژ بۆ پاراستنا مافێن گەلێ کورد ل سووریەیێ سەری ل سازیێن ئەورۆپی بدن. ژ بۆ ڤێ ئارمانجێ، وان ل سەر ئاستا ناڤنەتەوەیی دەست ب بەرھەڤکرنا بەلگەیێن تاوانێن ل حەلەبێ کرن و راپۆرتەکا فەرمی پێشکێشی پارلامەنتۆیا ئەورۆپایێ کرن.
ئەڤ نامەیا کو ژ بۆ پارلامەنتۆیێ ھاتبوو شاندن، بەلگەنامەیەکا یاسایی یا خورت بوو کو پشتا خوە دسپارد پەیمانێن جێنەوایێ و پرەنسیبێن مافێن مرۆڤان یێن ناڤنەتەوەیی. د راپۆرێ دا پێنج داخوازێن سەرەکی جھ دگرتن: ئەنجامدانا لێکۆلینەکا ناڤنەتەوەیی یا سەربخوە، دابینکرنا پاراستنا بلەز ژ بۆ سڤیلێن کورد، سەپاندنا سزایێن گران ل سەر تاوانباران، پشتگریکرنا پێڤاژۆیەکا سیاسی یا گشتگیر ب بەشداریا کوردان و بەرفرەھکرنا ئالیکاریێن مرۆڤی بۆ لێقەومیان.
پشتی پێڤاژۆیەکا کۆنترۆلکرنا شەش مەھان، د 8ێ تیرمەھا 2026ێ دا بەرسڤا فەرمی یا پارلامەنتۆیا ئەورۆپایێ کو ب ئیمزەیا بۆگدان رزۆنجا (سەرۆکێ کۆمیتەیا داخوازیان) ھاتبوو ئامادەکرن، گھیشت دەستێ نوونەرێن جوانێن کورد. ھەر چەند ئەڤ بەرسڤ ژ ئالیێ دەمێ ڤە پیچەکێ درەنگ مابیت ژی، لێ ژ بەر ناڤەرۆکا خوەیا ئەرێنی و حقووقی، ھێڤیەکا مەزن د ناڤ گەلێ کورد و جوانێن رۆژئاڤایێ کوردستانێ دا ئافراند.
پارلامەنتۆیا ئەورۆپایێ د بەرسڤا خوە دا ب فەرمی راگھاند کو ئەڤ مژار ب تەڤاھی د چارچۆڤەیا قادێن چالاکیا یەکیتیا ئەورۆپایێ دایە. ژ بەر گرنگیا مژارێ، پارلامەنتۆیێ دۆسیە ب فەرمی ئاراستەیی کۆمیتەیا کارێن دەرڤە و ژێرکۆمیتەیا مافێن مرۆڤان کر دا کو ب ھوورگولی و ل سەر ئاستا بلند چاڤدێریا رەشنڤیس و رەوشا ھەرێمێ بهێت کرن.
د داخویانیێ دا ھاتە دەستنیشانکرن کو پارلامەنتۆیا ئەورۆپایێ ب توندی ھەموو تووندوتیژیێن ل دژی وەلاتیێن سڤیل و ب تایبەتی ل دژی پێکھاتەیا کورد ل باکور و رۆژھلاتێ سووریەیێ ھاتنە کرن شەرمەزار دکەت و ئەڤ کریارە وەکی “تاوانێن شەری” و بنپێکرنا گران یا مافێن مرۆڤان پێناسە کرنە. پارلامەنێ دوبارە کر کو ئەو دێ ل سەر پشتگریا خوە یا ماییندە ژ بۆ پاراستنا مافێن سڤیل، سیاسی و پەروەردەھیێ یێن کوردان ل سووریەیێ بەردەوام بن.
ئەڤ سەرکەفتنا دیپلۆماتیک کو بەرھەما کەدا جوانێن کوردە، بەلگەیەکا زەلالە کو ھەولدانێن رەڤەندا کوردی ل دەرڤەیی وەلات دکارن گوھەرتنێن مەزن د سیاسەتا ناڤنەتەوەیی دا ئاڤا بکن. ب ڤێ گاڤا دیرۆکی، دۆسیەیا ئێشێن حەلەب و رۆژئاڤایێ کوردستانێ د رەفێن ژبیرکرنێ دا نەما، لێ بەلێ بوو بەشەک ژ ئەجیندایا فەرمی یا پاراستنا مافێن مرۆڤان د ئاستا ھەری بلند یا یاسادانینا ئەورۆپایێ دا.
