کریزا دەستھلاتداریێ د ناڤبەرا پارتیا دەمێ و شارەدارێ قۆسەرێ دا کوور دبیت
بوویەرێن داوی یێن کو ل شارەداریا قۆسەرێ (قزلتەپە) روو دانە، نیقاشێن ل سەر ناکۆکیێن ناڤخوەیی یێن د ناڤبەرا پارتیا دەمۆکراسی و وەکھەڤیا گەلان (پارتیا دەم) و شارەدارێن وێ دا جارەکا دن ئانین رۆژەڤێ.
زەینی ئیپەک، کو د ھلبژارتنێن ھەرێمی دا ل سەر لیستەیا پارتیا دەمێ وەکی ھەڤشارەدارێ قۆسەرێ ھاتبوو ھلبژارتن، پشتی دەمەکێ کورت ژ بەر ناکۆکیێن سیاسی و ئیداری ژ پارتیێ ڤەقەتیا. ئیپەک، تەڤی ڤەقەتینا خوە ژی راگھاند کو ئەو دێ وەکی شارەدارەکی سەربخوە ئەرکا خوە بەردەوام کەت.
ل گۆری زانیاریێن ژ چاڤکانیێن ھەرێمی ھاتنە گرتن، رێڤەبەریا پارتیا دەمێ داخواز دکە کو زەینی ئیپەک نە تنێ دەستبەردانا خوە ژ پارتیێ، بەلکو ژ پۆستا شارەداریێ ژی بکەت داکو ئەندامێن مەجلیسا شارەداریێ کەسەکی نوو ژ بۆ ڤێ پۆستێ ھلبژێرن. لێ بەلێ، ئیپەک ئەڤ داخواز رەد کر. د ئەنجامێ دا، ناکۆکیێن د ناڤبەرا کۆما مەجلیسا شارەداریێ یا پارتیا دەمێ و شارەدار زەینی ئیپەک دا رۆژ ب رۆژ کوورتر بوون و کارێن شارەداریێ رووبروویی ئاستەنگیان بوون.
ئەڤ ئالۆزیا سیاسی ھەری داوی د جڤینا مەجلیسا شارەداریێ دا دەرکەت ئاستەکێ بلند. ل گۆری نووچەیێن ھاتنە راگھاندن، نوونەرێ زەینی ئیپەک ژ ئالیێ ئەندامێن پارتیا دەمێ ڤە ھاتە پرۆتەستۆکرن. ھات ئیددیعاکرن کو د دەما جڤینێ دا ھێک ل نوونەرێ ئیپەک ھاتنە ئاڤێتن و ژ بەر ڤێ یەکێ نوونەری قادا جڤینێ بجیهێلایە.
بوویەرێن مینایێن قۆسەرێ، بەرێ ل شارەداریا سلۆپیایێ ژی روو دابوون. ھەڤشارەدارا سلۆپیایێ ژیان ئۆرامان ژی ژ بەر ناکۆکیێن ناڤخوەیی ژ پارتیا دەمێ ئیستفا کربوو، لێ دەست ژ وەزیفەیا خوە بەرنەدابوو. ئۆرامان ل دژی زەخت و بەرتەکێن پارتیێ راگھاندبوو:
“ئەز ب دەنگێن گەل ھاتمە ھلبژارتن و ئەز دێ ل سەر کارێ خوە بم داکو خزمەتا خەلکێ خوە بکم.”
چاڤدێرێن سیاسی و چاڤکانیێن ھەرێمی سەرنجێ دکشینن سەر سەدەمێن بنگەھین یێن ڤان ناکۆکیان. ل گۆری ئیددیعایان، سەدەما سەرەکی یا ڤان کریزان ھەولدانا کۆنترۆلکرنا شارەداریانە. تێ دیارکرن کو ھندەک بەرپرسێن ل پشت پەردەیێ ھەول ددن بریارێن ئابۆری و ئیداری یێن شارەداریان دیار بکن و چاڤکانیێن شارەداریێ بەر ب خەتێن سیاسی ڤە ب رێ ڤە ببن. ئەڤ رەوش ژی دبیتە سەدەم کو ھندەک شارەدار ل دژی ڤان دەستوەردانان دەرکەڤن و د ئەنجامێ دا کریزێن ب ڤی رەنگی یێن ناڤخوەیی دەرکەڤن ھۆلێ.
