نێچیرڤان بارزانی: لندسی گراھام دۆستەکی بنرخێ گەلێ کورد بوو

سەرۆکێ ھەرێما کوردستانێ نێچیرڤان بارزانی، ھەڤخەمیا خوە یا کوور بۆ کۆچا داوی یا سیناتۆرێ ناسکری یێ ئامەریکایێ لندسی گراھام نیشان دا و ئەو وەکی دۆستەکی بنرخ و دلسۆزێ گەلێ کورد ب ناڤ کر.

سەرۆکێ ھەرێما کوردستانێ، ئیرۆ یەکشەمێ (12ێ تیرمەھا 2026ێ) ل سەر حەسابا خوەیا تۆرا جڤاکی “X”ێ پەیامەکا ھەڤخەمیێ بەلاڤ کر و راگھاند:

“ب خەم و کۆڤانەکا مەزن ڤە من نووچەیا کۆچا داویێ یا سیناتۆر لندسی گراھام بھیست، کو دۆستەکی بنرخێ گەلێ کوردستانێ بوو. ھەلوەست و پشتگریا بێراوەستان و نەسەکنی یا وی سیناتۆری بۆ کوردستانێ دێ ھەر تم ب رێز ڤە د بیرئانینان دا بمینە. ئەز ژ دل سەرساخیێ ژ مالبات، دۆست و ھەڤکارێن وی را دخوازم.”

ئەڤ پەیام پشتی داخویانیا فەرمی یا نڤیسینگەھا سیناتۆرێ پارتیا کۆماری ھات بەلاڤکرن. نڤیسینگەھا گراھام یا ل ویلایەتا کارۆلینایا باشوور دیار کر کو سیناتۆر لندسی گراھام، دوھ شەمیێ (11ێ تیرمەھا 2026ێ) دانێ ئێڤارێ ژ بەر نەخوەشیەکا کورت و ژ نشکێ ڤە، د 71 سالیا خوە دا کۆچا داوی کریە.