پارتیا وەلاتپارێزن کوردستانێ: مە جینۆسایدا گەلیێ زیلانێ ژ بیر نەکریە و ئەم ژ بیر ناکەین ژی
نڤێسینگەها راگھاندنێ یا پارتیا وەلاتپارێزێن کوردستانێ (PWK)، ئیرۆ دوشەمبێ (13ێ تیرمەھا 2026ێ) د سالڤەگەرا 96ێ یا جینۆسایدا گەلیێ زیلانێ دە داخویانیەکا فەرمی ب سێ زمانان (کورمانجی، زازاکی و ترکی) بەلاڤ کر. PWK د داخویانیا خوە دە دەستنیشان کر کو وان ئەڤ جینۆسایدا مەزن ژ بیر نەکریە و چ جاران ژ بیر ناکەن ژی.
د داخویانیێ دە ھات ببیرخستن کو ئەڤ کۆمکوژیا ھۆڤ د سەردەما سەرھلدانا ئاگریێ دە، د 13ێ تیرمەھا 1930ێ دە ب فەرمانداریا جەنەرال سالح پاشا، فەرماندارێ فەیلەقا دەولەتا ترکیەیێ، ل گەلیێ زیلانێ ھاتیە کرن. پارتیا وەلاتپارێزن کوردستانێ دیار کر کو د ئەنجاما ڤێ قرکرنێ دە نێزیکی 15 ھەزار کورد کو د ناڤ وان دە زارۆک، ژن، پیر و دەرگووشێن نووبوویی ھەبوون، ب ئاوایەکی ھۆڤانە ھاتن قەتلکرن و 44 گوندێن ھەرێمێ ب تەمامی ھاتن شەوتاندن.
پارتیا وەلاتپارێزێن کوردستانێ پشتی دەرباسبوونا 96 سالان، ئەنجامدەر و بەرپرسێن ڤێ جینۆسایدێ روورەش و شەرمەزار کرن. د داویا داخویانیا نڤێسینگەها راگھاندنێ دە ھات گۆتن کو ئەو وەکی مالباتا شەھیدان ڤێ جینۆسایدا مەزن د بیرا خوە دە زندی دھێلن و ھەموو شەھیدێن کوردستانێ ب رێز و حورمەت ب بیر تینن.
