بووبێ ئەسەر

ملەتەک دەما ل سەمبۆلێن خوەیێن نەتەوەیی خودان دەرکەڤیت، دکاریت بژیت و ل سەر لنگێن خوە راوەستیت. دەما ئەڤ پیڤانە نەبیت، ئەو ملەت رۆژ ب رۆژ بەر ب ژناڤچوونێ ڤە دچیت. لەورا گەلەکا گرینگە کو دڤێت ئەڤ سەمبۆلە بهێن پاراستن.

ئیرۆ رەوشا باکورێ کوردستانێ وەھایە کو پاراستنا ڤان سەمبۆلان ھەما ھەما نەمایە. ژ بەر کو دەولەتا داگیرکەر و پەکەکە ب ھەڤرا خەبتینە و لێ دخەبتن کو چ سەمبۆلێن نەتەوەیی د ناڤا کوردان دە نەمینن. ژ بەر کو ئەو باش دزانن دەما سەمبۆل نەمینن گاڤ ب گاڤ ئەو ملەت ژی بەرب ژناڤچوونێ ڤە دچیت.

یێن سەمبۆلێن نەتەوەیی خورت دکەن، ل سەر لنگان دھێلن، دەنگبێژ، سترانبێژ، نڤیسکار و فۆلکلۆرا وی ملەتییە. یێن ڤان سەمبۆلان ژی دپارێزن ئەو ب خوە نە. لێ ئەو ژی ب تەنا خوە نابیت. لەورا ئیرۆ ئەڤە ژی نکارن ب ڤان خەباتێن خوە بژین. دەما نەشێن بژین ژی بەرھەمدار نابن. دەما بەرھەمدار نەبن ژی، زمان، عادەت، کلتور و ھزرا نەتەوەیی رۆژ ب رۆژ لاواز دبیت.

دەما بەرھەمێن نوو نەیێن ئافراندن، زمان دمریت، دەما زمان مری ئەو نەتەوە و ئەو ملەت ژی دمریت. ژ بەر ڤێیە ئیرۆ باکورێ کوردستانێ، ل سەر پرا سیراتێ یە. یان دێ کەڤیت و د ناڤا ئاگری دا سۆژیت یانژی ب سایا ھەولدان و زۆرێ دێ ژ پرێ دەرباس بیت و ژیت.

ئەڤ ژی گرێدایێ کرینا بەرھەمێن نڤیسکارێن کورد یێن ب کوردییە. ئالیکاری و پشتگریا ھونەرمەند، دەنگبێژ، سترانبێژ و فۆلکلۆرا  کوردییە.

ل سەر ناڤێ ملەتەکی سی ملیۆنی، ھەگەر نڤیسکار و ھونەرمەند نەشێن ل سەر کەدا خوە ب رەحەتی بژین، دڤێت ئەم وەکە ملەت ل سەر ڤێ راوەسیتن. وەکە پارتیێن سیاسی دڤێت ئەڤە بکەڤیتە بەرنامەیێن وان. لێ نەبوومە شاھد کو یەک ژ پارتیێن مە یێن سیاسی ل سەر ڤێ مژارێ راوەستابیت، نەرین و دیتنێن خوە ژ بۆ رایا گشتی و ھەڤالبەندێن خوە دیار کربن. ئەم بەرھەمێن خوە بەلاش ژی ژ بۆ وان دشینن، لێ زەحمەتێ نابەن کو دو رێزان ل سەر وان بنڤیسینن…

ھەگەر ھەر پارتیەکا مە یا سییاسی و کوردستانێ 10 پرتووکێن نڤیسکارێن کورد و دەھ سیدیێن ھونەرمەند و دەنگبێژن خوە بکرن ئەڤە دێ بیتە ئالیکاری و پشتگریەکا باش ژ بۆنا وان. ھەم ژی ئەڤە دێ بیتە ھەولدانەک کو ئەندامێن وان ژی خوە فێری کرینا بەرھەمێن نڤیسکار و ھونەرمەندێن خوە بکن.

ئەم ھەمی دزانین کو بێ پشتگری چ کار ب سەرناکەڤن. نڤیسکارەک و ھونەرمەندەک تەنێ د قالبێ خوە دە بمینیت، ئەو ب پێشناکەڤیت. نەبپێشکەفتنا وان ژی دڤێت ئەم ژ بیر نەکین کو زمان و ھونەرا کوردی ژی ھێدی ھێدی وەندا دبیت.

بالا خوە بدنێ کو ئیرۆ ل ترکیێ ھێلا بەحرا رەش ملەتەکی نە ترک ب ناڤێ لاز دژین یان دژیان. لێ ترکان چ کرن، ب ئاوازێن وان ترکی ستران گۆتن و ئەو ژی ل بەر وێ ئاوازێ ب ترکی رەقسێ یان فۆلکلۆرا خوە دکن. پشتی دەمەکێ دوور و درێژ یان پشتی سەد سالان نھا ئەو چاند یا بوویە یا ترکان.

ئەز ژ ڤێ یەکێ باوەرم کو دێ د رۆژ و سالێن پێش دە وێ چەندێ ب سەرێ کوردان ژی ئینن. وێ ب مەقام و ئاوازێن کوردی و ب گۆتنێن ترکی موزیکا کوردی ژی بکن یا خوە. دەما گۆڤەند ژی ل گۆر گۆتنێن ترکی بهێت کرن ئاھا ژ وە رە ئێدی ستران و گۆڤەندێن کوردی پشتی دەمەکێ درێژ دێ وەکی یا لازان بنە یێن ترکان.

ژ بەر ڤێ گرینگە کو دڤێت ئەم ب گشتی خوەدی ل نڤیسکار و ھونەرمەندێن کورد دەرکەڤین. ئەز شاھدێ وێ یەکێ مە کو گەلەک نڤیسکار و ھونەرمەند ژ بەر کو نکارن خوە ب ڤێ کەدا خوە، خوەدی بکن دەست ژ وێ بەرددن و دچن د کارێن رەستورانتان دە یان د دایرەیێن دەولەتێ دە کار دکن. ب ڤێ ژی زمان و ھونەرا کوردی رۆژ ب رۆژ دمریت.

چارەسەری:

ئەز دزانم کو رەوشا پارتیێن مەیێن سیاسیا ئابۆری نە باشە. نکارن ھونەرمەند و نڤیسکارێن خوە خوەدی بکن، لێ مخابن بەرھەمێن وان ژی ناکرن و نافرۆشن. دڤێت ڤێ بکن.

یا دن دڤێت شەڤ و شاھیان ژ بۆنا وان ئامادە بکن و ھاتنا وان شەڤ و شاھیان دڤێت ژ وان نڤیسکار و ھونەرمەندان رە بن. لێ پارتیێن مە ڤێ ژی ناکن. چ دکن؟ پەران ژ وان کۆم دکن و پێ دچن شین و شاھیان، ھەڤدیتن و جڤینێن بێ ئەنجام.

ھەگەر پارتی، شەخس، کەس و کەسایەتیێن مە خوەدی ل نڤیسکار و ھونەرمەندێ خوە دەرنەکەڤن، دێ رۆژەک هێت کو ئێدی ئەم حەسرەتا گوھداریا ھونەرمەندەکی کو ب کوردی سترانا ببێژیت، بن. ئەم دێ ل بەرھەمێن نڤیسکارێن خوە یێن کورد و خوەدی مژارێن گرینگ گەرین.

پرانیا مە، ئەم دبێژین: دیرۆکا مە ژ تەرەف داگیرکەران ڤە ھاتیە و تێ نڤیسین. لێ ئیرۆ ئالیکاری و پشتگری ھەبیت، یێن دکارن دیرۆکا مە بنڤیسینن گەلەکن. یێن دکارن ب بەرھەمێن خوەیێن کوردی زمانێ شێرین ب پێشڤە ببن پرن. لێ…