خوینا کوردان و درۆشمێ «براتیێ»: پارادۆکسا بەردەوام یا پەکەکێ
كهجهكێ ئیرۆ د سالڤهگهرا شۆرشا رۆژئاڤا ده داخویانیهك بهلاڤ كر و گۆت: گهلێ مه ل رۆژئاڤا دێ دهستكهفتیێن خوه ل سهر خهتا رێبهر ئاپۆ بپارێزه و ب پێش بخه. بهحسا سیستهما “نهتهوهیا دهمۆكراتیك” ژی كر كو ل رۆژئاڤا بوویه میناكهك بێ وێنه ل رۆژهلاتا ناڤین. سیستهما كو ت رۆژئاڤا ل هۆلێ نههشتی!!.
ههڤسهرۆكاتییا كۆنسهیا رێڤهبهر یا كهجهكێ، ئیرۆ 19 تیرمهها 2026ێ د سالڤهگهرا 19ان یا شۆرشا رۆژئاڤا دا داخویانییهك بهلاڤ كر.
دهستكهفتیێن رۆژئاڤا و خهتا ئاپۆ!
سیاسهتا پهكهكێ ههر چ دژمنهكی كوردان ههیه ئانی رۆژئاڤا
كهجهكێ د داخویانییا خوه ده ئانی زمان كو گەلێ رۆژئاڤا کوردستانێ دێ هەمی دەستکەفتێن خۆ یێن كو ل سەر خەتا رێبەر ئاپۆ بدەستخستینە دێ بپارێزه و ب پێش ژی بخه.
تهڤی مالوێرانی و وهنداهیێن كو ل سایا سهرێ پهكهكێ و رێبهرێ وێ یێ ل ئیمرالیێ ب رۆژئاڤا و گهلێ وێ كهتین، پهكهكه ئیرۆ هاتییه دخوازه جارهكه دن گهلێ رۆژئاڤا بخاپینه و ژ وان ره ببێژه: “هوون ب خێرا ئاپۆ دژین و تشتا كو وه ههیه ژی ب خێرا ئاپۆ یه”.
ب سهدهما سیاسهتا شاش یا پهكهكێ د 10 سالێن رابووری ده، ژ زۆردارییا ل گهلێ رۆژئاڤا و زۆرداری و دژاتیكرنا پارتیێن كوردستانی و هلوهشاندنا یهكتییا كوردان ژی، ههر چ دژمنهكی كوردان ههیه كهت د وێ پهرچهیا كوردستانێ ده، ژ دهولهتا ترك و ڤهقهتاندنا باژارێن عهفرین، سهرێ كانیێ و گرێ سپیێ و پشتره ئۆپهراسیۆنێن چهتهیێن شامێ یێن كو بوونه سهدهما ژ هۆلێ راكرنا ب تهڤاهی یا ستاتۆیا رۆژئاڤا.
ئاپۆ مازلووم عهبدی و ئیلهام ئهحمهد نهچاری تهسلیمیهتێ كرن
گهلێ كورد د 19 سالێ رابووری ده پێتری 22 ههزار شههیدان د پاراستنا رۆژئاڤا ده دان، لێ فهرمانا ئاپۆ ل سهر مهزلووم عهبدی و ئیلهام ئهحمهدێ هات فهرز كرن كو دهڤ ژ ههر تشتی بهردن و تهڤلی پهرگالا شامێ ببن و ههر تشتی تهسلیم ئهحمهد شهرع بكن.
پهكهكێ و رێبهرێ وێ یێ ل ئیمرالیێ، رۆژئاڤا ژ بۆی رازیكرنا تركیهیێ ل سهر سێنیهك زێر پێشكێشی شامێ كر و ت ستاتۆیهك ل ور نههشت.
ئیرۆ ژی هاتییه ب رووقایمی ڤه دبێژه: “تشتا كو وه ل سهر خهتا ئاپۆ ب دهست خستی هوونێ ب ههمان ئاوایی بپارێزن و ب پێش بخن”.
د بهشهكه دن یا داخویانییا خوه ده كهجهكێ قالا سیستهما “براتییا گهلان و نهتهوهیا دهمۆكراتیك” كرییه و دبێژه: ئهڤ سیستهم وێ ببه میناكهك بێ وێنه ل تهڤاهییا رۆژهلاتا ناڤین.
پهكهكێ گۆتییه: ل سەر بنەمایێ ئازادیا ژنێ و پێکڤەژیانا برایانە یا گەلان (کورد، عەرەب، سریان، تورکمان، ئەرمەن و چەرکەز)، مودێلەکا دیموکراتیک و ناڤخۆیی هاتە ئاڤاکرن کو بوو ميناك ل رۆژهەلاتا ناڤين.
براتییا گهلان رییا چهتهیێن شامێ ڤهكر!
براتییا گهلان كو پهكهكه بانگا وێ بۆ رۆژئاڤا دكر، رێ ژ بۆی چهتهیێن شامێ ڤهكر كو ب سهر رۆژئاڤا ده ب گرن، كهچ و خۆرت، زارۆكێن كوردان ب ساخی سهر ژێ كرن، ب پۆستالێن گهنی پێ ل روویێن كهچێن كوردان كر، كهزیێن وان ژێ كرن و شهرڤانێن كوردان ب ساخی د بالخانهیێن بلند ده ئاڤێتن عهردێ.
ل بن ناڤێ براتییا گهلان، عهرهبێن تهكفیری یێن سووریهیێ كورد قهتلعام كرن و هێژان ژی پهكهكه دبێژه: براتییا گهلان و نهتهوهیا دهمۆكراتیك.
بهلێ پهكهكه راست دبێژه: پهكهكه دخوازه ل ژێر ناڤێ براتییا گهلان و سیستهما دهمۆكراتیك قرا كوردان ل رۆژئاڤا بینه و تشتا مایی ژی ژ ناڤ ببه.
پهكهكێ بهحسا چوونا پێشمهرگهی بۆ كۆبانێ نهكری
د دهبارێ شهرێ ل دژی داعشێ ده و بهرخوهدانا كۆبانیێ، پهكهكێ بهحسا عهرهب، سریان و ئهنترناسیۆنالیستان كرییه و تهنێ بهحسا پێشمهرگهیێ كوردستانێ نهكر، ههر وهكه وێ كۆبانێ رزگار كرییه و نههشتی بكهڤه.
ووسا دیاره پهكهكێ ژبیر كرییه ههتا وێ كێلهكا بهری پێشمهرگه دهرباسی رۆژئاڤا ببه، 80% یا كۆبانیێ كهتبوو دهستێ تهرۆرا داعشێ و ب گهیشتنا پێشمهرگهی د دهمهك زوو ده و پشتی دایینا شههید و برینداران، ههڤسهنگییا هێزێ ڤهگوههری و پێشمهرگهی مل ب ملێ شهرڤانان ههر د زوو ده كۆبانێ ژ زۆرا داعشێ رزگار كر.
ل ژێر “سیاسهتا پهكهكێ” گهلێ رۆژئاڤا مەزنترین زیان د دیرۆکا خوە دا دیتیە
ل ژێر “سیاسهتا پهكهكێ” گهلێ رۆژئاڤا كوردستانێ مەزنترین زیان د دیرۆکا خوە دا دیتیە، ژ بهر كو فهرمانا عهبدوللا ئۆجالان بوو کو ڕۆژئاڤا ب تەمامی ژ ناڤبری و ژ هۆلێ ڕاکری، نە جۆلانیێ ترسنۆک و چەتەیێن وی بوون. ئاپۆ بوو یێ کو هەر حەفتیێ سێ جاران نامە بۆ ڕۆژئاڤا دهنارتین و ژ وان ڕا دگۆت: “خوە تەسفییە بکەن و سووریایا دیموکراتیک ئاڤا بکەن.”
ب كورتاسی، ههتا وێ دهما باندۆرا پهكهكێ ل سهر رۆژئاڤا ههبه و رێڤهبهرێن رۆژئاڤا فهرمانێ ژ قهندیلێ و ئیمرالیێ بستینن، ت گوههرتنهك ئهرێنی د رهوشا كوردان ده ل وێ پهرچهیا وهلات چێنابه و كورد وێ بهردهوام ب پیلانێن مهزنتر ره روو ب روو بمینن.
