ھەڤشارەدارێ باژارێ مەزنێ دیاربەکرێ دۆگان ھاتون دەست ژ کارێ خوە بەردا
ھەڤشارەدارێ شارەداریا باژارێ مەزن یا دیاربەکرێ دۆگان ھاتون، ئیرۆ دوشەمێ (20ێ تیرمەھا 2026ێ) ب ئاوایەکی فەرمی راگھاند کو د چارچۆڤەیا “پرەنسیبا ڤەکشینێ” دە دەست ژ پۆستا خوەیا ھەڤشارەداریێ بەردایە. ھاتون ل سەر حەسابا خوە یا تۆرا جڤاکی “X”ێ داخویانیەک بەلاڤ کر و سپاسیا خەلکێ دیاربەکرێ کر کو د ھلبژارتنێن ھەرێمی یێن 31ێ ئادارا 2024ێ دە ب رێژەیا نێزیکی %65 باوەری دابوون وی و ئەو وەکی ھەڤشارەدار ھلبژارتبوون.
دۆگان ھاتون د داخویانیا خوە دە بال کشاند سەر سەدەمێن سیاسی و ئیداری یێن ڤێ بریارێ و ئەشکەرە کر کو پشتی رەخنە و نرخاندنێن کۆنفەرانسا رێڤەبەریێن ھەرێمی یا پارتیا خوە، وی ب دلفرەھی کێماسیێن خوەیێن د دەما خەباتێ دە قەبوول کرنە. ھاتون ئانی زمان کو د پێڤاژۆیا نوو دە نەکاریبوو د ئاستا داخوازا پارتی و گەل دە بەرسڤا بەرپرسیاریان بدە و د وارێ پێشکێشکرنا خزمەتگوزاریان و پێشەنگیێ دە نەگەھشتیە ئاستا کو ژێ دھات ھێڤیکرن.
رێگریەکا دن یا سەرەکی یا ل پێشیا خەباتێن ھاتون پرسگرێکێن وی یێن تەندورستیێ بوون. ناڤبۆری دیار کر کو د دەما وەزیفەیا خوەیا دو سالان دە 3 جاران نەشتەرگەری دەرباس کریە و ئەڤ نەخوەشی ژ ئالیێ فیزیکی ڤە بوویە ئاستەنگەکە مەزن کو ئەو نەکاربە ب ئاوایەکی چالاک تەڤلی کار و پرۆژەیێن شارەداریێ ببە.
ل ئالیێ دن، پارتیا دەمۆکراسی و وەکھەڤیا گەلان (دەم پارتی) ژی ب داخویانیەکا فەرمی بریارا ڤەکشینا دۆگان ھاتون پشتراست کر. دەم پارتیێ راگھاند کو داخوازا ھاتون یا ژ بۆ ڤەکشینا ژ وەزیفەیێ کو بەرێ پێشکێشی سازیێن پێوەندیدارێن پارتیێ کربوو، ژ ئالیێ لژنەیان ڤە گونجایی ھاتیە دیتن و ب فەرمی ھاتیە قەبوولکرن.
