دەمێ چارەنڤیسێ تهڤگهرێ دکەڤیتە پێش مافێن مللەتی!
چیا تهكین
ل 20ێ تیرمهها 2026ێ، ئەو لایەنێ خۆ وەک رێڤەبەریا تهڤگهرێ دایه نیاسین، بەیاننامەیەک ل دۆر یاسایا چارچۆڤەیی یا چاڤەرێکری ل تورکیا بەلاڤکر و تێدا داخوازا زامنکرنا ئازادیا جەستەیی یا عەبدوللا ئۆجەلانی کر کو پشکداریێ د گەنگەشەکرنا یاسایێ دا بکەت، دیسان رێخۆشکرن بۆ سەرکردایەتی و شەرڤانێن تهڤگهرێ دا کو پشکداریێ د ژیانا سیاسی یا دیموکراتیک دا بکەن.
ژ ناخێ وێ بەیاننامێ پسیارەک سەر هەلددەت کو نابیت بهێتە پاشخستن: گەلێ کورد ل کیڤەیی یاساێیه یە کو دهێتە چاڤەرێکرن کێشەیا وی چارەسەر بکەت؟
نەبوونا دەنگ و نەرازیبوونێ ل سەر ئازادیا ئۆجەلانی نینە و نەژی ل سەر پێدڤیا دۆزینەڤا چارەسەریەکا یاسایی یا دادپەروەرانە بۆ سەرکردایەتی و شەرڤانێن بزاڤێ یە، چونکی هەر ڤەگوهاستنەکا راستەقینە ژ هەڤرکیا چەکداری بۆ سیاسەتێ پێدڤی ب زامنیان هەیە دا کو ئاشتی نەبیتە داڤەکا یاسایی.
لێ ئاریشە ل وێ دەرێ دەستپێدکەت دەمێ مافێن تهڤگهرێ و سەرکردێ وێ و کادرێن وێ روھنتر لێ دهێن ژ مافێن وی گەلی یێ کو تهڤگهر هەر ژ بنەرەت دا ل سەر ناڤێ کێشەیا وی دروستبووی.
بەیاننامە بەحسێ گەلێ کورد و کێشەیا کوردی دکەت، لێ ب روھنی پێگەهێ نەتەوەیی و سیاسی دیار ناکەت یێ کو دێ کورد دناڤ تورکیا دا بدەستڤە ئینن.
ئەو ب هوویری دچنە د ناڤ بابەتێ ئازادیا ئۆجەلانی و زڤرینا شەرڤانان و تێکەلکرنا سەرکردایەتیێ د سیاسەتێ دا.
لێ دانپێدانا دەستووری ب گەلێ کورد ل کیڤەیە؟
ئەرێ زامنکرنا زمانێ وی و مافێ خواندنێ ب وی زمانی ل کیڤەیە؟
پاراستنا ناسنامە و دابونەریتێن وی ل کیڤەیە؟
ئەرێ خۆرێڤەبەریا خۆجهی و مافێن سیاسی و کۆمەلەیی ل کیڤەن؟
ب ڤی رەنگی، کورد د گۆتارا وان دا تەنێ وەک ناڤ ئامادەنه، لێ د پرۆژێ چارەسەریێ دا وەک گەلەکێ خودی ماف بەرزە و وندانە.
ئاشتی ب رامانا خۆ یا فەلسەفی تەنێ بێدەنگکرنا چەکی نینە، بەلکو ژناڤبرنا وان ئەگەرانە یێن بووینە سەدەمێ هەلگرتنا چەکی.
ئەگەر شەر ب داوی هات و ئینکارکرن ما، کێشە ب داوی ناهێت، بەلکو دێ ژ گۆرەپانا رووبریبوونێ ڤەگوهێزیت بۆ ناڤ دەزگەهێن یاسایی، کارگێری، رۆشنبیری و دیمۆکراتیەتێ.
ئەو دیمۆکراتیەتا دانپێدانێ ب کوردی وەک تاکەکەسی دکەت لێ دانپێدانێ ب وان وەک گەل ناکەت، دیمۆکراتیەتەکا تەمام نینە، بەلکو شێوازەکێ هێمنترە بۆ برێڤەبرنا ئینکارکرنێ.
چێنابیت کێشەیا گەلەکێ بهێتە کورتکرن د چارەنڤیسێ سەرکردەیەکێ دا، پێگەهێ وی یێ مێژوویی هەر چەند بیت یان د پێشەرۆژا تهڤگهرێ دا کو قوربانیێن وێ چەند زێدە بن.
ئۆجەلان دشێت ببیتە دانوستاندکارەکێ سەرەکی و زامنکەرێ ڤەگوهاستنێ، لێ گەلێ کورد خۆدانێ کێشێ یە و ژێدەرێ شەرعیەتا وێ یە، سەرکردە پێگەهێ خۆ ژ کێشەیێ وەردگریت، نەک کێشە هەبوونا خۆ ژ سەرکردەی پهێدابکەت.
ل ڤێرێ ئەم دکەڤینە د ناڤبەرا دوو کورتکرنێن دژی ئێک دا:
دەولەت دخوازیت کێشەیا کوردی کورت بکەت د دانانا چەکی دا.
تهڤگهر ژی خەریکە چارەسەریێ کورت دکەت د ئازادیا ئۆجەلانی و رێکخستنا رەوشا کادرێن خۆ دا.
د ناڤبەرا ڤان هەردوو کورتکرنان دا، ئەو پسیارا سەرەکی و جەوهەری بەرزە دبیت: گەلێ کورد دێ چ بدەستڤە ئینیت؟
ئەگەر یاسایێ کۆتایی ب هەبوونا بزاڤا چەکداری ئینا ب بێی کو کۆتاییێ ب ئینکارکرنا مافێن نەتەوەیی یێن کوردی بینیت، وى دەمى دێ بیتە یاسایەک بۆ رێکخستنا پاشەرۆژا تهڤگهرهكێ، نەک یاسایەک بۆ چارەسەرکرنا کێشەیا مللهتهكێ.
