پشتی پێڤاژۆیا ئاشتیێ یا ل ترکیەیێ دەست پێ کری، بەرسڤا پرسا “گەلۆ دێ چ ب سەرێ رێبەرێن پەکەکێ هێت؟” ھێژ ژی زەلال نەبوویە. ل سەر ڤێ مژارێ گەلەک ئیدیعا ھاتنە کرن. ھەری داوی، نڤیسکارا رۆژنامەیا نەفەسێ، نورای باباجان، ئیدیعا کر کو د چارچۆڤەیا پێڤاژۆیا ئاشتیێ یا بەردەوام دە، پلان ھەنە کو 200 سەرکردەیێن پەکەکێ بۆ باژارێ سلێمانیێ یێ ھەرێما کوردستانێ بهێن ڤەگوھاستن.

د نڤیسا خوە یا ژ بۆ رۆژنامەیا نەفەسێ دە، نڤیسکار باباجان دیار کر کو جھێ بجھبوونا سەرۆکاتیا پەکەکێ ھاتیە زەلالکرن و وھا گۆت:

“ل گۆری ئاگاھیێن ھاتنە بدەستخستن، جھێ کادرۆیێن سەرۆکاتیا پەکەکێ یا کو ژ 200 کەسان پێک دهێت، کو نایێ خواستن د چ شەرت و مەرجان دە ڤەگەرن ترکیەیێ، ھاتیە زەلالکرن. پشتی رێزە ھەڤدیتنان، ب تایبەتی ل ھەرێمێن سووریێ و باکورێ ئیراقێ، دهێتە پلانکرن کو ئەڤ کەسە ل باژارێ سلێمانیێ یێ باکورێ ئیراقێ بهێن بجھکرن.

تێ راگھاندن کو ستراتەژیا شاندنا کادرۆیێن سەرۆکاتیا پەکەکێ بۆ وەلاتێن سێیەمین، د سەری دە ئەورۆپایێ، پشتی ڤالاکرنا قەندیلێ ھاتیە گوھەرتن.

بریار ھاتیە دایین کو ئەڤ کادرۆ دڤێت ل ھەرێمەکا کۆنترۆلکریتر بهێن بجھکرن، ژ بەر کو ئیحتیمالا بکارئانینا وان ژ ئالیێ رێخستنێن ئیستیخباراتێ یێن بیانی ڤە ھەیە. ھەرێمەکا کو ژ بۆ چاڤدێری و کۆنترۆلا ترکیەیێ گونجاوتر بیت ھاتیە هەلبژارتن.”

“ھندەک کەس گاڤێن ھێدی یێن حکوومەتێ د پێڤاژۆیێ دە وەکی موزایەدەیەکا دانوستاندنێ دبینن.”

ژ ئالیەکی دن ڤە، باباجان دیار کر کو سەدەما ھێدیبوونا گاڤێن ژ بۆی پێڤاژۆیا ئاشتیێ ئەوە کو ئاک پارتی “ب زانەبوون” گاڤێن خوە هێدی دهاڤێژە. باباجان د گۆتارا خوە دە دیار کر کو د ناڤ ئاکەپێ دە ھندەک کەس ھەنە کو دبێژن: “دبیت کو ژ بەر ئەزموونێن نەسەرکەفتی یێن بەرێ ترس و بێباوەری ھەبیت. ئەو ھەر وھا ژ ڤێ راستیێ حەز ناکن کو ئەندامێن دەم پارتیێ ب بەردەوامی سەرۆکێ مەھەپێ دەولەت باخچەلی وەکی ناڤبەینکار بناڤ دکن.”

راستبوونا ڤێ نووچەیێ چیە؟

رۆژنامەیا نەفەس وەشانەکە کو د ڤان دەمێن داویێ دە گەلەک ئیدیعا ل سەر پەکەکێ کرنە. ئەو ب ئیحتیمالەکا مەزن وەکی وەشانەکێ دهێتە حەسباندن کو ژ ھێلا دەولەتێ ڤە ژ بۆ ساختەکرنا رایا گشتی و ئامادەکرنا وێ ژ بۆ چالاکیێن پێشەرۆژێ دهێتە بکارئانین. ئیدیعایا کو سلێمانی وەکی بارەگەھەک ژ بۆ سەرۆکێن پەکەکێ ھاتیە ھلبژارتن، دبیت یەک ژ نووچەیێن کو ل سەر ڤێ بنگەھێ ھاتنە ئامادەکرن بیت.

باوەریەکا گشتی ھەیە کو دەولەتێ ب زانەبوون پەکەکە بەر ب سلێمانیێ ڤە ئاژۆتیە و ل ور قادەکا کۆمبوونێ چێکریە. ل گۆری ئاگاھیێن کو د دەستێ مە دە نە، پەکەکێ کادرۆیێن خوە ژ گەلەک دەڤەران ڤەکشاندنە و ل سەر سینۆرێ د ناڤبەرا ھەرێما کوردستانێ و رۆژھلاتێ کوردستانێ دە کۆم کرنە. وەکی دن، بەشەکێ گرینگ ژ سەرۆکێن پەکەکێ بەرێ خوە دانە دەڤەرێن گوندەواری یێن سلێمانیێ. ژ بلی دەڤەرێن چیایی یێن دوور یێن وەکی قەندیل، خینێرە و زەلێ، گەلەک سەرۆکێن پەکەکێ ل دەڤەرێن دەردۆرا سلێمانیێ یێن وەکی چارتای، چەمچەمال، قەرەداخ و چەمێ رێزان ژی ھەنە. فکار ھەنە کو ئەڤە ژ ئەرکا نوویا کو ژ ھێلا دەولەتا ترکیەیێ ڤە ب پەکەکێ ھاتیە دایین دەرکەتبیتە ھۆلێ.

ھێڤی ھەنە کو رەوشا د ناڤبەرا پەکەکێ و دەولەتێ دە و رەوشا سەرۆکێن پەکەکێ دێ لگەل نێزیکبوونا بھارێ ژ ھێلا شەرت و مەرجێن ھەیی ڤە هێتە دەستنیشانکرن.