پەیاما سەرۆک بارزانی د سالڤەگەرا 43ێ یا ئەنفالا بارزانییان دە
سەرۆک مەسعوود بارزانی د سالڤەگەرا ئەنفالا بارزانییان دە راگەھاند کو مخابنیەکا مەزنە کو ھەتا نھا برینا تو یەک ژ وان کۆمکوژی و ژەنۆسیدان نەھاتیە دەرمانکرن. سەرۆک بارزانی تەکەز ژی کر: “ل ڤێ دەرێ ئەم تەکەز دکن کو ئەرکێ ل سەر ملێ دەولەتا ئراقێیە کو قەرەبوویا مادی و مانەوییا ھەمی وان تاوان و زلمان بکەیێن کو د سەدسالا بۆری دە ل ھەمبەر گەلێ کوردستانێ ھاتنە کرن.”
سەرۆک بارزانی ئیرۆ (ئینی، 31ێ تیرمەھا 2026ێ) د سالڤەگەرا ئەنفالا بارزانییان دە پەیامەک بەلاڤ کر و تێ دە راگەھاند: “تاوانا ئەنفالا بارزانییان د 31ێ تیرمەھا 1983ێ دە، پارەک ژ دەستپێکا زنجیرا تاوانێن رێخستی بوو؛ ژ ونداکرنا 12 ھەزار جوانێن کوردێن فەیلی ھەتا پێلێن ئەنفالا گەرمیان و بەھدینانێ، کیمیابارانکرنا ھەلەبجە و دەڤەرێن دن یێن کوردستانێ، عەرەبکرن، ڤەگوھاستن و ب دەھان تاوانێن دن یێن نەمرۆڤی کو ب ئارمانجا تنەکرنا ناسنامەیێ و شکاندنا ئیرادەیا ئازادیخوازییا گەلێ مە ژ ئالیێ رێژیما بەرێیا ئیراقێ ڤە ل دژی گەلێ کوردستانێ ھاتبوون کرن.”
سەرۆک بارزانی دیار ژی کر کو د ئەنفالا بارزانییان دە، رێژیما بەرێ یا ئیراقێ 8 ھەزار مێرێن جوان و پیرێن بارزانی، تەنێ ژ بەر بارزانیبوون و کوردبوونێ و ب ھنجەتێن بێبنگەھ گرتن و پشتی ڤەگوھاستنا وان، ب رەنگەکێ نەمرۆڤی د بیابانێن باشوورێ ئیراقێ دە کۆمکوژ کرن.
سەرۆک بارزانی ھەروەسا گۆت: “مخابنیەکا مەزنە کو ھەتا نھا برینا تو یەک ژ وان کۆمکوژی و ژەنۆسیدان نەھاتیە دەرمانکرن. ل ڤێ دەرێ ئەم تەکەز دکن کو ئەرکێ ل سەر ملێ دەولەتا ئراقێ یە کو قەرەبوویا مادی و مانەوییا ھەمی وان تاوان و زلمان بکەیێن کو د سەدسالا بۆری دە ل ھەمبەر گەلێ کوردستانێ ھاتنە کرن.”
سەرۆک بارزانی د پەیاما خوە دە سپاسیا خەلکێ دەشتا ھەولێرێ، حەریر و سۆرانێ کر و راگەھاند: “د سالڤەگەرا 43ێ یا ئەنفالا بارزانییان دە، ئەز سپاسیا جەماوەرێ دەشتا ھەولێرێ، حەریر و سۆرانێ دکم کو د وان دەمێن تژە ئێش دە ھەڤسۆزێن بارزانییان بوون و ئالیکارییا وان کر. پێزانینێن من بۆ خوەراگرییا بێوێنەیا کەسوکارێن ئەنفالکرییان ھەنە، ب تایبەتی وان دایک و ژنێن بھێز و خوەراگرێن بارزانی کو گەلەک سالان ئێشا دووراھی و ژدەستدانا عەزیزێن خوە کشاند، لێ سەرێ خوە نەچەماند و ب ھەزاران زارۆکێن سەربلند و نەتەوەپەروەر پەروەراندن.”
