یەپەژە: راپۆرتێن تەڤلیبوونا د ناڤا وەزارەتا کارێن ناڤخوە نەراستن
یەکینەیێن پاراستنا ژنێن رۆژئاڤا (یەپەژە) داخویانیەکا نڤیسکی وەشاند و ئیدیعایێن کو دبێژن ئەو رازی بوونە کو وەکی ھێزەکا سەربخوەیا دژی تەرۆرێ تەڤلی وەزارەتا کارێن ناڤخوە یا سووریەیێ ببن، رەد کرن. یەپەژێ دیار کر کو وان ژ رێڤەبەریا شامێ چ پێشنیار یان بریارەکا فەرمی ژ بۆ ڤێ یەکێ وەرنەگرتیە.
ئەڤ داخویانی پشتی نرخاندنەکێ کو ژ لایێ عەبدولکەریم عۆمەر، نوونەرێ رێڤەبەریا خوەسەر ل شامێ، ژ بۆ رووداوێ هاتبوو کرن، ھات.
عۆمەر دیار کربوو کو یەپەژە رازی بوویە کو وەکی ھێزەکا دژی تەرۆرێ د ناڤ وەزارەتا کارێن ناڤخوە یا سووریەیێ دە خزمەتێ بکە، و ئەڤ یەک وەکی بەشەک ژ ھەولدانێن ژ بۆ جێبەجێکرنا پەیمانا کو لگەل شامێ ھاتیە چێکرن ب ناڤ کر.
“ژ شامێ پێشنیارەکا فەرمی نینە”
روکەن جەمال، بەردەڤکا ناڤەندا چاپەمەنیێ یا یەپەژێ، دیار کر کو دانوستاندنێن لگەل رێڤەبەریا شامێ د بن پەیمانا 29ێ چلەیا 2026ێ دە بەردەوام دکن.
روکەن جەمال دیار کر کو وان د مەھا نیسانێ دە لگەل وەزیرێ بەرگریێ مرهەف ئەحمەد ئەبوو قەسرەت ھەڤدیتنەک کریە و رەشنڤیسەک پێشکێشی رێڤەبەریا شامێ کریە کو ئەرک و مافێن یەپەژێ دەستنیشان دکە.
لێبەلێ، روکەن جەمال تەکەز کر کو وان هێژ پێشنیارەک یان بریارەکا فەرمی ژ شامێ وەرنەگرتیە. وێ زێدە کر کو پێشنیار ھەنە کو یەپەژە وەکی ھێزەکا سەربخوە یا دژی تەرۆرێ د ناڤ وەزارەتا کارێن ناڤخوە دە بهێتە تەڤلی کرن، لێ هێژ لھەڤکرنەکا زەلال ل سەر ڤێ مژارێ نەھاتیە کرن.
جڤینێن نوو دێ ل شامێ هێن لدارخستن
داخویانیا یەپەژێ دەستنیشان کر کو د رۆژێن پێش دە دێ جڤینێن نوو لگەل رایەدارێن شامێ وەرن لدارخستن، و ئەڤ مژار دێ هێتە نیقاش کرن.
د داخویانیێ دە ھەر وھا ھەڤۆکا “ئەم دێ تێکۆشین و خەباتا خوە بدۆمینن ھەیا کو هەبوونا یەپەژێ ب یاسایی وەرە ئەولەکرن” ژی ھەبوو.
داخویانیا یەپەژێ ئەشکەرە کر کو پێڤاژۆیا دەربارێ بەشداربوونا رێخستنێ د ئاڤاھیا ئەولەھیێ یا رێڤەبەریا شامێ دە هێژ ژی د قۆناغا دانوستاندنان دەیە و بریارا داویێ نەھاتیە دایین.
