بووبێ ئەسەر

رۆژا پەکەکە دامەزراندن و ھەتا نھا ئارمانجا وێ ئەو بوو کو کورد نەبن خوەدیێ چ مافێن خوە یێن نەتەوەیی.

ژ بەر ڤێ بوو کو عەڤدللا گۆتبوو: “ھەتا ئەز و پەکەکە ھەبن دێ بارزانی نکاربە سەرخوەبوونا کوردستانێ راگھینە”. د ئەسلێ خوە دە رامانا گۆتنا وی ئەو بوو کو کورد دێ نکاربن ببن خوەدی دەولەتا خوە.

واتە ژ گۆتنا عەڤدللا دیارە کو دبێژە ئەز دێ ھەمی کوردان بخم بن ئەمرێ ترکان. ڤەکری دبێژە کو دڤێت کورد نەبن خوەدیێ خوە و چ تشتەکی. دڤێت تم کۆلە و خزمەتکارێن داگیرکەران بن.

ب سایا ئالیکاری و پشتگریا دەولەتێ ب رێیا شەرێ چەکداری پرانیا کوردان تەسلیم گرتن. ھێژا، زانا و کەسێن تێگھشتی ب ئالیکاریا دەولەتێ کوشت یان دانە کوشتن. یێن مایی ژی ب حکمێ زۆر، ترس و رانتێ ب خوە ڤە گرێدان ئانگۆ تەسلیم کرن. ب ڤێ ژی جڤاتا رەوشەنبیریێ کۆرەفام کر.

د ناڤا ڤێ تەسلیمگرتنێ دە دو نفش ژی لگەل عەڤدللا ھاتن مەزنکرن کو کارەسەتا ھەری مەزن ژی ئەڤ بوو. واتە ھەول دا و لێ خەبتی کو کەسێن پشتی 1980 تێنە و ھاتن دنێ تەنھا لگەل عەڤدللا دانە مەزنکرن کو ھای و بالا وان ژ مەزنێن وان تونە بت. ب ڤێ ژی ب سەرکەتن.

ل سەر پەکەکێ و عەڤدللا گەلەک ھاتیە و دهێت نڤیسین. لێ مخابن ئیزاح، گۆتن و نڤیساندنا رەوشا پەکەکێ و ھەمی رێخستنێن وێ نە ئاسانە کو تو ڤێ رەوشێ ب جڤاتێ بدەیە زانین. ژ بەر کو ئەڤە سەرێ چەل سالانە کو جڤات و جوان ب پەکەکێ ھاتنە مەزنکرن و پەروەرکرن.

ژ بەر کو پرانیا رێبەر و سەرۆکاتیا پەکەکە-دەمێ ژ زلامێن دەولەتێ پێک تێن. دەما رێڤەبر ژی ئەو ب خوە بن، دێ چاوا دۆزا کوردستانێ هێت پاراستن؟؟؟

چارەسەری:

ل گۆر نەرین و دیتنا من دڤێت ھەمی پارتی کەس و کەسایەتێن کورد گرانیێ بدن کار و خەباتێن ل دژی دەمێ. ژ بەر کو کارێ نھا کو دەم دکە، ئاسیملەکرن و ئەنتەگارسۆیانا کوردان و تونەکرنا کوردانە.

ئەوقاس جڤین، مەش و خوە پێشاندان ژ بۆنا فکرا تونەکرنا کوردان و ب سەرخستنا رامانێن عەڤدللا نە. ژ بۆنا نەرین و دیتنێن عەڤدللا ب جڤاتێ بدن قەبوولکرنێ چ ژ وان تێ تەخسیر ناکن. ئەو فکر و رامانە ژی ل سەر ئەساسێ تەسلیمبوون ئانگۆ تونەبوونا کوردان ب خوە نە.

ھەگەر ئەم وەکە کورد و کوردستانی ژ بۆنا ڤێ ھەلوەستا دەمێ یا ل گۆر فکر و رامانێن تونەکرنا کوردان یا عەڤدللا، ب ھەڤرە، ئەم نەبن خوەدی تەمسیلەک کوردستانی ئەم دێ ھەمی ب ھەڤرە وەندا بکن.

ب سالانە کو مە وەنداکرییە و وەندا دکن. لێ ھێژ ژی ھندەک رێ و رێباز مانە کو ئەم دکارین خوە و ملەتێ خوە ژ بەر تۆفانا داگیرکەران، فکر و رامانێن عەڤدللا و دەمێ ئازاد بکن.

 رێیا ڤێ ژی تەنھا یەکتی و یەکرێزیا ناڤا مالا کوردان ب خوەیە. ھەگەر د دامەزراندنا کۆمارا ترک دە ھەمی شێخ، عەشیر، ئاخا و مالباتێن کورد یێن مەزن ب ھەڤرە و ل گەل ھەڤ تەکۆشینا ئازادیا خوە و وەلاتێ خوە دابانا، نھا ئەم ژی خوەدی وەلاتێ خوەێ ئازاد بانا.

لۆما دبێژم و پێویستە کو دڤێت دەملدەست یەکتی و یەکرێزیا ناڤا مالا کوردان پێک بێ. مادەم داخوازا پرانیێ ئازادیا وەلاتیە، چما ئەڤ ڤێ پێک ناینن؟؟؟. گەلۆ چ سەدەم ھەیە کو ئەم نکارین یەکتی و یەکرێزیا خوە پێک بینن؟؟؟

کوردێن ل باکورێ کوردستانێ ل سەر دەستێ دەمێ ل بەر تونەبوونێ نە. ھەگەر ئەڤ باش نایێ زانین و خوەندنێ ئەم دێ ھەمی ب ھەڤرە وەندا بکن. ژ بۆنا سەرکەتنێ ژی دڤێت ئەم ل ھەمبەر ھەڤ خوەشبین بن. خوەدی لێبۆردەیی بن و بکاربن ھەڤدو قەبوول بکن.

دڤێت نەیێ ژ بیر کرن کو چ دەما ئەم ببن یەک، تەمسیلەکا کوردستانی ب ھەڤرە دەرخن، د وارێ دیپلۆماسی ل سەر ئاساسێ ل ھەڤکرنەکێ، مرۆڤێن پسپۆر پەیدە بکن، ئەم دێ ب سەرکەڤن. لۆما کار و خەباتێن ل ئەورۆپا گرینگن. ل گۆر ڤێ گرینگیێ ژی دڤێت ئەم ب ھەڤرە تەڤبگەرن.

ھەگەر ئەم وەکە کورد و رێخستنێن کوردستانی ڤێ ب ھەڤرە نەکن، دێ پرۆژەیا عەڤدللا و دەولەتێ یا کو ب ھەڤرە دمەشینن ب سەر بکەڤە. ئەو ژی تونەبوونا کوردانە…