مەسروور بارزانی: زێدەتری ھەزار ئێریشێن ب درۆن و مووشەکان ل سەر ھەرێما کوردستانێ ھاتنە کرن
سەرۆکوەزیرێ ھەرێما کوردستانێ مەسروور بارزانی د داخویانیەکێ دە ژ بۆ کانالا ئەل جەزیرە راگھاند کو ھەرێما کوردستانێ راستەراست ژ ئالیێ ئیرانێ ڤە یان ژی ژ ھوندرێ ئیراقێ ب رێیا گرووپێن چەکدار رووبروویی زێدەتری ھەزار ئێریشێن مووشەکی و درۆنان بوویە. بارزانی تەکەز کر کو ئەو ناکەڤن ناڤ چ ھەڤرکیەکا ھەرێمی و کارێ وان یێ پێشین پاراستنا ئارامیا ھەرێما کوردستانێیە.
سەرۆکوەزیر مسروور بارزانی بال کشاند سەر ھەولدانێن بەغدایێ یێن ژ بۆ سەپاندنا دەستھلاتا یاسایی و پشتگریا تەمام یا حکوومەتا ھەرێما کوردستانێ ژ بۆ کۆنترۆلکرنا چەکان د دەستێ ھێزێن فەرمی یێن دەولەتێ دە ئانی زمان. بارزانی دەستنیشان کر کو چ ئالیەکی زەخت ل سەر وان نەکریە کو تەڤلی شەری ببن و وان سیاسەتەکا ھەڤسەنگ ژ بۆ دوورخستنا ھەرێمێ ژ ئالۆزیان مەشاندیە.
د بەردەوامیا داخویانیا خوە دە، سەرۆکوەزیر مەسروور بارزانی ئیدیعایێن دەربارێ ھەبوونا پەیوەندیان ب ئیسرایلێ رە ب توندی رەد کرن و ب بیر خست کو برێڤەبرنا سیاسەتا دەرڤە د بن دەستھلاتا حکوومەتا فەدەرال یا ئیراقێ دەیە. بارزانی ھەروھا تەکەز کر کو ئەڤ 10 سالن چ ھێزێن لەشکەری یێن ئامەریکایێ ل بنکەیا ئاسمانی یا حەریرێ نینن.
دەربارێ پەیوەندیێن دیپلۆماتیک یێن لگەل وەلاتێن جیران، بارزانی دیار کر کو تێکلیێن وان یێن لگەل سووریەیێ بەر ب پێش ڤە دچن و پەیوەندیێن لگەل ترکیەیێ ژی د ئاستەکێ “پر باش” دە نە. ھات دەستنیشانکرن کو ھەولێر دخوازە پەیوەندیێن خوەیێن ئابۆری و سیاسی یێن لگەل جیرانێن خوە ل سەر بنگەھا رێزگرتنا ھەڤدو پێش بخە.
باژارێ ھەولێرێ و بنکەیێن ل ھەرێما کوردستانێ بەرێ چەندین جاران ژ ئالیێ سوپایێ پاسدارێن ئیرانێ و گرووپێن چەکدار ڤە ب بەهانەیێن ھەبوونا بنکەیێن ئیسرایلێ یان ھێزێن ئامەریکی دھاتن ئارمانجگرتن؛ لێ بەلێ حکوومەتا ھەرێما کوردستانێ ئەڤ تۆھمەت بەردەوام رەد کرنە و ژ جڤاکا ناڤدەولەتی داخوازا لێکۆلینێن بێالی کریە.
