پارتیا وەلاتپارێزێن کوردستانێ: “یاسایا چارچۆڤەیێ” بەردەوامیا پێڤاژۆیا ئینکار و پاشگوھکرنا کوردانە
نڤێسینگەها راگەھاندنێ یا پارتیا وەلاتپارێزێن کوردستانێ (PWK) ب داخویانیەکا بەرفرەھ ھەلوەستا خوە ل سەر “یاسایا چارچۆڤەیێ” کو د 10ی تەباخێ دە ل پارلامەنتۆیا ترکیەیێ ھات پەژراندن، دیار کر. PWKێ راگھاند کو ئەڤ یاسایە ژ بۆ چارەسەریا پرسێیە، بەلێ بەردەوامیا پۆلیتیکایێن سەدسالی یێن ئینکار و مژوولکرنا ملەتێ کوردە.
د داخویانیا پارتیا وەلاتپارێزێن کوردستانێ دە ھات دەستنیشانکرن کو پرۆژەیا ھەیی ب ھەڤکاریا دەولەتێ و عەبدوللاھ ئۆجالان تێ مەشاندن و ئارمانجا وێ یا بنگەھین ئاستەنگکرنا دەستکەفتی و ستاتویا سیاسی یا کوردانە ل ھەموو پارچەیێن کوردستانێ. پارتیا وەلاتپارێزێن کوردستانێ بال کشاند سەر وێ یەکێ کو د یاسایێ دە چ ھەڤۆک یان گۆتنەک ل سەر مافێن نەتەوەیی، دەمۆکراتیک، ئازادیا زمان و ناسنامەیا کوردان تونەیە؛ بەرەڤاژی ڤێ، داخوازێن رەوایێن گەلێ کورد د بن ناڤێ تەرۆرێ دە ھاتنە پێناسەکرن.
پارتیا وەلاتپارێزێن کوردستانێ ھەروھا تەکەز کر کو ئەو بەردان و بێدەنگکرنا چەکان یا پەکەکێ د بەرژەوەندیا گەلێ کورد دە دبینن، لێ گرێدانا مافێن نەتەوەیی یێن کوردان لگەل چەکدانینێ نێزیکاتیەکا شاشە. د داخویانیێ دە بانگا ئاڤاکرنا “شاندا نوونەراتیا نەتەوەیی یا کورد” ھاتە کرن کو ژ پارتی، سازیێن سڤیل و کەسایەتێن کورد پێک بهێت، دا کو دەولەت ژ بۆ چارەسەریەکا راستەقینە ڤێ شاندێ وەکی موخاتابێ بنگەھین ببینە.
