مەحموود بەرخوەدان: چ داخوازەکا مە یا ئاڤاکرنا دەولەتەکا سەربخوە یان ژی کوردستانەکێ ل سووریەیێ نینە
بەرپرسێ کۆبانیێ یێ ھێزێن سووریەیا دەمۆکراتیک (هەسەدێ) مەحموود بەرخوەدان د داخویانیەکا تایبەت دە ژ بۆ رۆژنامەیا تورکیەیێ راگھاند کو پێڤاژۆیا ئەنتەگراسیۆنا لگەل ئارتێشا سووریەیێ گھیشتیە قۆناغا داوی. بەرخوەدان دیار کر کو ئاستەنگیێن ل بەر ھەڤکاریێ ژ سەدی 99 ھاتنە دەرباسکرن و راگھاند کو ئەو دێ د ناڤا چەند رۆژان دە هلوەشاندنا فەرمی یا ھەسەدێ، یەپەگێ و سیستەما رێڤەبەریا خوەسەر ژ رایا گشتی رە ئەشکەرە بکن.
ل گۆری ئاگاھیێن کو ژ ئالیێ بەرخوەدان ڤە ھاتنە پارڤەکرن، ھەتا نھا نێزیکی 10 ھەزار شەرڤانێن وان ب ئاوایەکی فەرمی تەڤلی رەفێن ئارتێشا سووریەیێ بوونە و تێ تەخمینکرن کو ئەڤ ھەژمار بگھێژە 12 ھەزاران. وی ھەر وھا دەستنیشان کر کو ئیدیعایێن دەربارێ ھەبوونا 70 ھەتا 100 ھەزار شەرڤانان دە دووری راستیێ نە و دا زانین کو بەشەکێ مەزن یێ شەرڤانێن عەرەب ژی ژ ناڤا رەفێن وان ڤەقەتیانە. ل گەل ڤێ یەکێ، پێڤاژۆیا رادەستکرنا سازیێن گشتی و بیرێن پەترۆلێ یێن ل ھەرێمێ ژ بۆ رێڤەبەریا شامێ ل بەر ب تەمامبوونێ ڤە دچە.
د بەردەوامیا داخویانیا خوە دە، بەرپرسێ ھەسەدێ تەکەز کر کو چ داخوازەکا وان یا ئاڤاکرنا دەولەتەکا سەربخوە یان ژی کوردستانەکێ ل سووریەیێ نینە. وی دیار کر کو داخویانیێن ل سەر سەربخوەبوونا ھەرێمان نە راستن و ئارمانجا وان یا سەرەکی ئاڤاکرنا سووریەیەکا نوویە ل سەر بنگەھا “یەک ئارتێش، یەک دەولەت، یەک ئالا و وەلاتەکی ھەڤپار.” بەرخوەدان داخواز کر کو شام دەستوورەکێ نوو ئامادە بکە دا کو مافێن ھەموو پێکھاتەیێن ئەتنیکی و ئۆلی بهێن مسۆگەرکرن.
دەربارێ پێڤاژۆیا سیاسی و ھەرێمی دە، بەرخوەدان پەسنێ گاڤان و ریسکێن سیاسی یێن سەرۆککۆمارێ ترکیەیێ رەجەب تەییب ئەردۆگان و سەرۆکێ مەھەپێ دەولەت باخچەلی دا و ئەڤ گاڤ وەکی دەستکەفتیەکا دیرۆکی یا ب باندۆر ل سەر تەڤاھیا ھەرێمێ ب ناڤ کر. تەڤی کو مژارێن مینا رەوشا یەپەژێ و شەرڤانێن خوەدی ناسنامەیا ترکیەیێ هێژ ب تەمامی نەھاتنە چارەسەرکرن ژی، بەرخوەدان تەکەز کر کو پێڤاژۆیا چەکدانین و ئەنتەگراسیۆنێ گھیشتیە قۆناغەکا ڤەنەگەر.
