دەستەیا مافێن مرۆڤان ئێریشا درۆنی یا ل سەر پیرمامێ شەرمەزار کر
دەستەیا سەربخوەیا مافێن مرۆڤان ل ھەرێما کوردستانێ دەربارێ ئێریشا درۆنی یا سەرێ سبەھا ئیرۆ دە داخویانیەک بەلاڤ کر و ب توندی ئارمانجگرتنا دەڤەرێن ھەرێما کوردستانێ شەرمەزار کر. ئێریشا کو ژ سینۆرێن کۆمارا ئیسلامی یا ئیرانێ ڤە ل سەر قەزایا پیرمامێ ھاتە کرن، راستەراست نڤیسگەھا تایبەتا سەرۆکوەزیرێ ھەرێما کوردستانێ و جھێ مانێ یێ رێڤەبەرێ ئاژانسا پاراستنێ کربوو ئارمانج.
د داخویانیێ دە ھاتە دیارکرن کو دەمژمێر 12:28ێ سەرێ سبەھا ئیرۆ دوشەمبێ (17ێ تەباخا 2026ێ)، دو درۆنێن بۆمبەکری یێن ژ جوورەیێ “حەدید-110” ژ ئالیێ سینۆرێ ئیرانێ ڤە ھاتنە ئاراستەکرن. دەستەیێ تەکەز کر کو ئەڤ ئێریش بنپێکرنەکا مەترسیدار و ئەشکەرەیە ل دژی سەروەریا ئاخا ئیراق و ھەرێما کوردستانێ، و ل دژی ھەموو پیڤان و پەیماننامەیێن ناڤدەولەتی یێن مافێن مرۆڤانە.
تەڤی کو د ئەنجاما ڤێ ئێریشێ دە چ زرارێن جانی نەکەتنە ھۆلێ، دەستەیێ دەستنیشان کر کو پاراستنا ئەولەھی و ژیانا وەلاتیان مافەکی بنگەھینە. د داخویانیێ دە ھاتە دەستنیشانکرن کو ب چ ھنجەتان نابە ئاخا ھەرێما کوردستانێ ببە مەیدانا ئێریش، ھەڤرکی و پەیامێن لەشکەری یێن ئالیێن دەرڤە.
د داویا داخویانیا خوە دە، دەستەیا سەربخوەیا مافێن مرۆڤان بانگ ل حکوومەتا فەدەرالی یا ئیراقێ و جڤاکا ناڤدەولەتی کر کو ھەلوەستەکا زەلال و جدی نیشان بدن، ژ بۆ راوەستاندنا ڤان بنپێکرنێن بەردەوام گاڤێن لەزگین باڤێژن و ئەولەھی و سەروەریا ھەرێمێ بپارێزن. ھەر وھا دژەتیرۆرا کوردستانێ ژی داخویاند کو ئەڤ دەستدرێژی ب چ ئاوایی نایێن قەبوولکرن و ئەنجامێن وێ دکەڤن سەر ملێ ئەنجامدەران.
