مەسروور بارزانی: كشاندنا سیسته‌ما به‌ره‌ڤانییا ئاسمانی مه‌ رووبروویی مه‌ترسیێ دكه‌

سەرۆکوەزیر مەسروور بارزانی راگھاند، “مە ت گەفەک ل سەر ئاساییشا جیرانێن خوە ئاڤا نەکریە، لێ دڤێ ھوون ژ ئیرانێ بپرسن کا چما ئێرشی مە دکن”.

سەرۆکوەزیر مەسروور بارزانی د ھەڤپەیڤینەکە تایبەت ل گەل مالپەرا “ئال-مۆنيتۆر”ێ دە، دەربارێ چەند مژارێن ناڤخوەیی و ھەرێمی دە ئاخڤی و راگھاند: “مە ت گەفەک ل سەر ئاساییشا جیرانێن خوە ئاڤا نەکریە.” دەربارێ ئێرشێن ئیرانێ یێن ل سەر ھەرێما کوردستانێ دە ژی گۆت، دڤێ ئەو پرس ژ وان وەرە کرن کا چما ئێرشی مە دکن.

سەرۆکوەزیر ئاشکەرە کر، ئەڤ ھەولدان تەنێ ژ بۆ ترساندنا ھەرێما کوردستانێ نە و دخوازن کوردستانێ بکشینن ناڤ ناکۆکیێن کو ئالیێ کوردی ب توندی ل دژی وانە.

تێکلداری رەدکرنا بەرپرسیاریيا ئێرشان ژ ئالیێ ئیرانێ ڤە، سەرۆکوەزیر مەسروور بارزانی گۆت: “ب دیتنا من دڤێ بەرپرسێن ئیرانێ ب خوە لێکۆلینێ بکن، کا ئەو جورە درۆنێن کو تەنێ ل با وان ھەنە، چاوا ژ ئالیێ کەسێن دن ڤە ژ بۆ ئێرشکرنا سەر دەرڤەیی وەلاتێ وان تێن بکارئانین.”

مەسروور بارزانی نیگەرانیيا خوە ل سەر ڤەکشینا ھێزێن راھێنانێ یێن ئامەریکایێ ژ ھەرێما کوردستانێ و ڤەگوھاستنا پەرگالێن بەرەڤانیا ئاسمانی یێن پاتريۆت ئانی زمان. ھەروھا راگھاند کو وان ھین نەکاریە وان پەرگالێن بباندۆر ب دەست بخن، دا کو خوە ژ گەفان بپارێزن، لێ ھەولدانێن ژ بۆ وەرگرتنا وان شیانێن بەرەڤانیێ بەردەوامن. سەرۆکوەزیر بال کشاند سەر وێ یەکێ کو ئەو نھا پشتا خوە ب پشتەڤانیا دۆستێن ئامەریکی گرێ ددن کو د تێکبرنا پرانییا مووشەک و درۆنان دە سەرکەفتی بوونە.

سەرۆکوەزیر مەسروور بارزانی تەکەز کر ژی، ھەرێما کوردستانێ د بن مەترسیێ دەیە و بەردەوامیيا ئێرشان نایێ قەبوولکرن؛ لەوما داخواز ژ ھەموو دۆستێن ھەرێما کوردستانێ کر کو ژ بۆ ئاڤاکرنا وان شیانێن بەرەڤانیێ ئالیکاريیا وان بکن.

تێکلداری رەوشا سیاسییا ئيراقێ، مەسروور بارزانی سەرۆکوەزیرێ ئيراقێ ئەلی زەیدی وەکی سەرکردەیەکی راستگۆ و دۆست پێناسە کر کو ژ بۆ بەرژەوەندیيا وەلات کار دکە. بارزانی راگھاند، وان پشتەڤانیا خوە یا تام ژ بۆ وی نیشان دایە، ب تایبەتی د کارێن وی یێن ژ بۆ رووبرووبوونا گەندەلیێ، سەپاندنا سەروەريیا یاسایێ و چەکدانینا ملیسان.

دەربارێ داوین دەما کو زەیدی ژ بۆ چەکدانینا ملیسان (30ێ ئیلۆنێ) دیار کریيە، سەرۆکوەزیر ھێڤی کر کو ئەو گرووپێن چەکدار بەریا وێ دەمێ پابەند ببن. ھەر وھا گۆت: “ئەز باوەر ناکم کو ت کەس بخوازە رووبرووبوونەکە سەربازی ئان ژی ھەر جوورە تەڤلھەڤیەکێ د وەلات دە ببینە، لێ دڤێ حکوومەت تشتێ کو ژ بۆ پاراستنا وەلاتیان، سەروەریا وەلات و بەرەڤانیێ پێویستە، جیبجی بکە.”

مەسروور بارزانی بەحسا وێ یەکێ کر کو ھەر تم پرسێن ئيراقێ ب رەوشا ئیرانێ ڤە تێن گرێدان، لێ بەلێ دڤێ ئيراقی بەرژەوەنديیا نشتمانی، ئاساییش و ئارامیا وەلاتێ خوە بدن پێشیا ھەر تشتی، بێیی کو باندۆرا ھەڤرکیێن ئیرانێ ل بەر چاڤ بگرن. ھەر وھا پشتەڤانیا خوە ژ بۆ ھەولدانێن ئیدارەیا دۆنالد ترامپ يێن ژ بۆ ئارامیيا ناڤچەیێ و ھەڤکاریا لگەل کۆمپانیایێن ئامەریکی، ب تایبەتی د کەرتا نەفتێ دە دوبارە کر.

تێکلداری دەرەنگکەتنا پێکانینا حکوومەتا ھەرێما کوردستانێ دە راگھاند: “ئەز دەستێ دۆستانیێ ژ بۆ ھەر کەسی درێژ دکم و داخواز دکم وەرن و ژ بۆ پێکانینا حکوومەتێ بەشدار ببن؛ ئەڤ یەک د بەرژەوەندیيا بلندا خەلکێ کوردستانێ دە یە.”

سەرۆکوەزیرێ ھەرێما کوردستانێ دیار کر، ئەو پشتەڤانیا بریارا ڤەکشینا ھێزێن ئامەریکایێ ژ ئيراقێ دکن، لێ ھێڤیدارن کو ئەڤ یەک ڤالاھیەکە ئەولەھیێ ل ھەرێمێ ئاڤا نەکە. ھەروھا گۆت ژی: “ئەم دخوازن پێوەندیێن خوە یێن بھێزێن لگەل ئامەریکایێ ل دەرڤه‌یی ھەڤکاریێن سەربازی ژی بەرفرەھ بکن؛ ھەرێما کوردستانێ دێ وەکی ھەڤپارێ ھەری باوەرپێکری و دلسۆزێ ئامەریکایێ ل ناڤچەیێ بمینە.”