عەفرین: ل ناڤچەیا بلبلێ بەرھەمێن شوونواری یێن سەردەما لاتینی ھاتن ڤەدیتن
ل سەرانسەری ھەرێما عەفرینێ خەباتێن پاراستنا میراسا دیرۆکی و چاندی بەردەوام دکن. د ڤێ چارچۆڤەیێ دە، د ئەنجاما لێگەرین و شۆپاندنەکا ھوورا تیمێن ئۆفیسا شوونوارێن عەفرینێ و ھێزێن ئەولەھیێ دە، ل گوندەکی سەر ب ناڤچەیا بلبلێ ھەژمارەک پارچەیێن شوونواری یێن گرینگ یێن سەردەما کەڤنار ھاتن دیتن.
ل گۆری ئاگاھیێن فەرمی یێن ھاتنە راگھاندن، بەرھەمێن ھاتنە ڤەدیتن ب تایبەتی ژ کێلێن گۆران و ستوونێن شوونواری یێن کەڤن پێک تێن. یا کو گرینگیا دیرۆکی یا ڤان پارچەیان ھێژ زێدەتر دکە، ھەبوونا نەقش و نڤیسێن ب زمانێ لاتینی یێ کەڤنە کو ل سەر وان ھاتنە کۆلاندن. ئەڤ ڤەدیتن رۆناھیێ دخینە سەر سەردەمێن بەرێ یێن ھەرێمێ و راستیێن نوو دەربارێ میراسا دیرۆکی دە دەردخە ھۆلێ.
پشتی ڤەدیتنێ، تیمێن پسپۆرێن قادێ راستەراست دەست ب خەباتێ کرن، بەرھەم ب ئاوایەکی زانستی بەلگە کرن و لێکۆلینێن دەستپێکێ ل سەر وان پێک ئانین. ژ بۆ رێگرتنا ل ریسکێن زرارێ و ژ بۆ پاراستنا ئەولەهیا ڤان پارچەیێن دیرۆکی، ھەموو بەرھەم ب ھەڤکاریا ئالیێن پەوەندیدار بۆ مووزەیا نشتمانی یا حەلەبێ ھاتن ڤەگوھاستن.
ئەڤ خەبات و پێنگاڤا ڤەدیتنێ د چارچۆڤەیا ھەولدانێن گشتی یێن سازیێن ھەرێمی دە تێ نرخاندن کو ئارمانجا وان پاراستنا دەولەمەندیا میراسا چاندی یا عەفرینێ و رێگرتنا ل بەر تالانکرن و برنا شوونوارێن کەڤنارێن ل ئاخا سووریەیێ یە.
