پارتیا وەلاتپاریزێن کوردستانێ ئێریشا نژادپەرەست یا ل زۆنگولداکێ شەرمەزار کر
نڤێسینگەها راگھاندنێ یا پارتیا وەلاتپارێزێن کوردستانێ (PWK) ئێریشا نژادپەرەست یا کو ل ناڤچەیا ئالاپلیێ یا سەر ب باژارێ زۆنگولداکێ ل دژی کارکەرێن کورد ھاتبوو کرن، ب داخویانیەکا فەرمی ب توندی شەرمەزار کر.
د داخویانیا PWKێ دە ھات دەستنیشانکرن کو زێدەتری 70 کارکەرێن دەمسالی و مالباتێن وان کو ژ ناڤچەیێن جزیر و سلۆپیایێ یێن شرنەخێ ژ بۆ بەرھەڤکرنا فندقان بەرێ خوە دابوون گوندێ بەکتاشلیێ، راستی ڤێ ئێریشێ ھاتنە. د دەما بوویەرێ دە دیمەنێن زارۆکێن کو د پشتا کامیۆنێ دە د ناڤ ترسێ دە دگریان، د رایا گشتی و تۆرێن جڤاکی دە بەرتەکێن مەزن ئانین زمان.
PWKێ ئەڤ بوویەر وەکی ئەنجاما سیاسەتا شۆفینیست یا ل دژی کوردان و بنپێکرنا مافێن مرۆڤاھیێ پێناسە کر. نڤێسینگەها راگھاندنێ دیار کر کو ئەڤ ئێریش ئەنجاما پەروەردە، سەختەکاری و زەختا جڤاکی یا شۆفینیستە کو ب دەھان سالانە د ھشمەندیا جڤاکێ دە تێ ئاڤاکرن.
د بەردەوامیا داخویانیێ دە داخواز ھات کرن کو ئەڤ بوویەر نەیێ پاشگوھکرن. PWKێ بانگ ل سەندیکایێن پارێزەران یێن ل کوردستانێ کر کو رێکارێن یاسایی یێن پێویست بدن دەستپێکرن و ژ دەزگەھێن ئەولەھیێ خوەست کو ئەنجامدەرێن ڤێ ئێریشێ دەستنیشان بکن دا کو ب سزایێ ھەری گران یێ یاسایی بێن سزادان.
پارتیا وەلاتپارێزێن کوردستانێ د داویێ دە بانگ ل ھەموو پارتیێن سیاسی، سازیێن جڤاکی و رووسپیێن کورد کر کو ل دژی ڤێ ئێریشا نژادپەرەست ھەلوەستەکێ ھەڤپار نیشان بدن. ھەر وھا ژ دەردۆرێن کو ل ترکیەیێ ئالیگرێن مافێن مرۆڤان، دەمۆکراسیێ و ئازادیێ نە ژی ھات خوەستن کو ل ھەمبەری ڤێ ئێریشا شۆفینیست و دژە مرۆڤی دەنگێ خوە بلند بکن.
