سزایێ گرتیگەھێ بۆ سەرۆکێ شارەداریا بەشکتاشێ رزا ئاکپۆلات ھات دەرکرن

د دۆزا کو ب ناڤێ “عەزیز ئیحسان ئاکتاش” دھات مەشاندن دە، دادگەھەکا ترکیەیێ سزایێ گرتیگەھێ یێ گران بۆ سەرۆکێ شارەداریا بەشکتاشێ رزا ئاکپۆلات دەرکر. ل گۆری بریارا دادگەھێ، ژ بەر تۆھمەتێن وەرگرتنا بەرتیلێ و گەندەلیا د ئیحالەیان دە، ب تەڤاھی 21 سال، 23 مەھ و 37 رۆژ سزایێ گرتیگەھێ بۆ ئاکپۆلات ھاتە دەرکرن. د ھەمان دەمێ دە دادگەھێ دەست دانی سەر ھەموو مال و ملکێن وی یێن ل ھەرێما چۆرلویێ.

ل گۆری ھوورگلیێن کو ژ دۆسیەیا دادگەھێ ھاتنە وەرگرتن، ئاکپۆلات ژ بۆ ھەر دو تۆھمەتێن جودا یێن وەرگرتنا بەرتیلێ ب 6 سال و 3 مەھان سزایێ گرتیگەھێ ھاتیە سزادان. لگەل زێدەکرنا سزایێن دن یێن تێکلداری بنپێکرنا رەگەزێن ئیحالەیێ و گەندەلیێ، ماوەیێ گشتی یێ سزای گھیشت زێدەتری 23 سالان. لێ بەلێ دادگەھێ ئاکپۆلات ژ تۆھمەتا “ئەندامبوونا رێخستنێ” بەرائەت کر. ھاتە راگھاندن کو ناڤبۆری دێ د گرتیگەھێ دە بمینە و تەدبیرا ل سەر ملکێن وی ژی بەردەوام بکە.

سەرۆکێ شارەداریا بەشکتاشێ رزا ئاکپۆلات کو ژ پارتیا گەلا کۆماری (جەهەپێ)یە و ئەڤ شەش سالن رێڤەبەریا ڤێ ناڤچەیا ستراتەژیک یا ئەستانبوولێ دکە، بریارا دادگەھێ ب توندی رەد کر. ئاکپۆلات دۆز وەکی “بوھتانەکا سیاسی” ب ناڤ کر و د داخویانیا خوە دە گۆت: “من چ تاوانەک نەکریە کو ببە سەدەما سەرشۆریا زارۆک، مالبات و گەلێ بەشکتاشێ. ئەم دێ لگەل ھەڤالێن خوە ڤێ سیستەما کو ل سەر بنگەھا بوھتانان ھاتیە ئاڤاکرن، ژ رەھ و ریشالان ڤە هلکێشین.”