فاشیزما پەکەکێ ل دژی رەخنەگران: گەفێن کوشتنێ ل دکتۆر سەربەست نەبی تێن کرن
پەکەکێ ڤێ داویێ ل سەر مەدیایا جڤاکی نێچیرا رەخنەگران دایە دەستپێکرن. گرووپا پەکەکێ یا ل سەر مەدیایا جڤاکی، ژ بلی کو ئەکوانتێن کەسێن کو پەکەکێ رەخنە دکن پەیدا دکە و ب رێیێن وەکی ریپۆرتکرنێ ددە گرتن، ھەر وھا گەفێن کوشتنێ ل کەسێن ناڤدار و ب باندۆر ژی دکە. یەک ژ ڤان ناڤان ژی در. سەربەست نەبییە.
در. سەربەست نەبی کو بخوە ژ رۆژئاڤایێ کوردستانێیە و مامۆستەیێ زانینگەھا کۆیەیێیە، د رابۆریێ دە ل دژی سیستەما ل رۆژئاڤا رەخنە کربن ژی، ھەلوەستەک کو پشتگری و خوەدیدەرکەتن ل رۆژئاڤا د ناڤا خوە دە دحەواند نیشان دابوو. ب تایبەتی د پەڤچوونێن حەلەبێ دە ب بانگێن خوەیێن ژ بۆ دەرکەتنا کۆلانان و خوەدیدەرکەتنا ل رۆژئاڤا دھات ناسین. لێ بەلێ، لگەل کو رێڤەبەریا ل رۆژئاڤا لگەل شامێ دەستکەفتیێن کوردان خستن سەر مێزە و تەڤلی پۆلیتیکایا ئەنتەگراسیۆنێ یا ئۆجالان بوو، نەبی ل دژی پۆلیتیکایا رۆژئاڤا و ئۆجالان رەخنە کرن. سەرەرایی رەخنەیێن خوەیێن ل گۆری زانستا سیاسەتێ و د ئاستەکە گونجاو دە ژی، در. سەربەست نەبی ژی پشکا خوە ژ گەفێن پەکەکێ وەرگرت.
در. سەربەست نەبی د پارڤەکرنا خوە یا ل سەر مەدیایا جڤاکی دە ئەشکەرە کر کو ب رێیا تەلەفۆن و مەدیایا جڤاکی پەکەکێ گەفێن کوشتنێ ل وی کرنە.
در. سەربەست نەبی دیار کر کو ل دژی وی و مالباتا وی ژ ئالیێ ئالیگرێن پەکەکێ و پەیەدێ ڤە گەلەک ئێرشێن د ئاستێن گەف، سڤکاتی و تەشھیرکرنێ دە ھاتنە کرن.
پشتی داخویانیا نەبی، ل سەر مەدیایا جڤاکی ب تایبەتی د مەدیایا عەرەبی و سۆرانی دە پشتگریەکە مەزن ژ بۆ در. سەربەست نەبی ھات نیشاندان.
ژ کەسێن کو پشتگری دانێ، نڤیسکار ئیبراھیم یووسف دیار کر کو ئەو دفکرە نەبی و مالباتا وی ژ بەر ھەلوەستێن خوە بوونە ئارمانجا “کامپانیایەکا توندووتێژیێ”. وی ئەڤ رەوش ب کامپانیایێن وەکھەڤ یێن کو ب سالانە کەسێن خوەدی دیتنێن جوودا دکن ئارمانج رە گرێ دا. یووسف تەکەز کر کو ئەو ئارمانجکرنا کەسێن خوەدی نێرینێن جوودا یان ژی تەڤلیکرنا مالباتێن وان د ناکۆکیێن سیاسی دە رەد دکە و سەربەست نەبی وەکی یەک ژ وان دەنگێن کو د سەردەمەکە گرینگ دە ژ بۆ گەلێ کورد و سووریەیێ ب وێرەکی دۆزا گەلێ خوە دپارێزە پێناسە کر.
نڤیسکار سەبری رەسوول ژی دیار کر کو کامپانیایێن شەرمەزارکرن، سڤکاتی و بۆھتانان یێن کو ئەو کەسێن بەشداری پۆلیتیکایێن پارتیا کارکەرێن کوردستانێ (پەکەکێ) نابن دکن ئارمانج، نیشانەیا “ئیفلاسا سیاسی یا پەکەکێ”یە. رەسوول بال کشاند سەر وێ یەکێ کو لیستەیا کەسێن د بەر ڤان رێبازان رە دەرباس بوونە گەلەکی درێژە.
