سەردانا مەزلووم عەبدی پشتی وێ کارەساتا گران تێ کو بەربانگا ئیرۆ د ئەنجاما دەرکەتنا ئاگرەکی مەزن دە ل گرتیگەھا باژێری روو دا. د ڤێ بوویەرێ دە 8 گرتیان جانێ خوە ژ دەست دا و زێدەتری 20 کەسێن دن ژی ژ بەر برینێن شەواتێ و خەنقینا ب دوومانێ بۆ نەخوەشخانەیێ ھاتن ڤەگوھاستن.
ل گۆری ئاگاھیێن ژ چاڤکانیێن ھەرێمی ھاتنە وەرگرتن، مەزلووم عەبدی ژ بۆ شۆپاندنا سەدەمێن ڤێ کارەساتێ، رەوشا گرتیگەھێ و بوویەرێن داوی یێن ل باژێری، لگەل ئالیێن پێوەندیدار و بەرپرسێن ئەولەھیێ جڤینەکا بەرفرەھ پێک ئانیە. ھەر وھا ھاتیە راگھاندن کو ژ بۆ پاراستنا ئەولەھیێ، قەدەغەیا چوونووھاتنێ ھەتا 72 دەمژمێرێن دن ل ناڤا باژارێ کۆبانیێ ھاتیە درێژکرن.
سەدەم و پێڤاژۆیا ئالۆزیان
چرووسکا سەرەکی یا ڤان ئالۆزیان شەڤا پێنجشەمێ، 10ێ ئیلۆنا 2026ێ دەست پێ کر؛ دەما کو جوانەکی ب ناڤێ سیپان حزنی (ئەندامێ لیوایەکا ئارتێشا سووریەیێ و شەرڤانێ بەرێ یێ ھێزێن سووریەیا دەمۆکراتیک – ھەسەدێ) ژ ئالیێ چەند کەسان ڤە ب ئاوایەکی ھۆڤانە ھاتە کوشتن.
کوشتنا سیپان حزنی بوو سەدەما بەرتەکا مەزن یا جڤاکی و ل کۆبانی، قامشلۆ و چەند باژارێن دن یێن ھەرێمێ پێلەکا بەرفرەھا خوەپێشاندان و نەرازیبوونان ل پەی خوە ئانی.
ل باژارێ کۆبانیێ، دەستوەردانا ھێزێن ئەولەھیێ یا ژ بۆ بەلاڤکرنا خوەپێشاندەران بوو سەدەما دەرکەتنا ئالۆزی و پەڤچوونان. ل پەی ڤێ یەکێ، ژ بۆ پاراستنا ئارامیا باژێر قەدەغەیا چوونووھاتنێ ھات راگھاندن و دەست ب گرتنا ژمارەیەک جوانێن نەرازی ھات کرن.
گرژی دەردۆرا دەمژمێر 2:00یێ بەربانگێ گھیشت لووتکەیێ؛ دەما کو ھێزێن ئەولەھیێ بریار دا بەشەک ژ جوانێن گرتی بەر ب زندانێن باژارێ حەلەبێ ڤە ڤەگوھێزن. گرتیان ل دژی ڤێ بریارێ نەرازیبوونەکا توند نیشان دا و د ناڤا گرتیگەھێ دە ئالۆزی دەرکەت. د ئەنجاما ڤێ ئالۆزیێ دە، پشتی کو ئاگر ب دۆشەکان کەت، پێتێن ئاگر ب لەز د ناڤا ھەموو ئاڤاھیێ دە بەلاڤ بوون و کارەساتا گران روو دا.
