شاندەکە دەم پارتیێ دێ سەردانا ئیمرالیێ بکە و لگەل عەڤدللا ئۆجالان بجڤە
جیگرێ ھەڤسەرۆکێ گشتی یێ پارتیا وەکھەڤی و دەمۆکراسیێ یا گەلان (دەم پارتی) تەیب تەمەل راگھاند کو د ناڤا ڤێ ھەفتەیێ دە شاندەکە پارتیا وان دێ سەردانا گراڤا ئیمرالیێ بکە و لگەل رێبەرێ پەکەکێ عەڤدللا ئۆجالان ھەڤدیتنەکێ پێک بینە.
ل گۆری داخویانیا تەیب تەمەل، بریارە شاندا ئیمرالیێ یا دەم پارتیێ رۆژا دوشەمێ، 14ێ ئیلۆنا 2026ێ، بچە گراڤا ئیمرالیێ. ھاتیە دیارکرن کو شاند ژ پارلەمەنتەرا وانێ پەرڤین بولدان، پارلەمەنتەرێ رحایێ میتحەت سانجار و پارێزەر فاێق ئۆزگور ئەرۆل پێک تێ. شاندەیا دەم پارتیێ ھەری داوی د 2یێ تەباخا بۆری دە سەردانا گراڤا ئیمرالیێ کربوو.
پێڤاژۆیا چارەسەریێ و یاسایا نوو
ئەڤ سەردانا شاندێ د دەمەکێ دە پێک تێ کو بەرێ د 10ێ تەباخا 2026ێ دە، ل پارلامەنتۆیا ترکیەیێ “یاسایا چارچۆڤەیێ”یا تایبەت ب پێڤاژۆیا چارەسەریێ ھاتبوو پەسەندکرن. ئەڤ یاسا ب تایبەتی چارەنووسا وان گەریلا و ئالیگرێن پەکەکێ دیار دکە کو ئامادە نە چەکێن خوە دەینن.
ل گۆری خالێن یاسایێ، ژ بۆ دەستپێکرنا پێنگاڤێن فەرمی، پێویستە کو دەزگەھێن ئەولەھیێ یێن دەولەتێ پشتراست ببن کو پەکەکێ و رێخستنێن گرێدایی وێ داوی ل ھەموو چالاکیێن خوە ئانینە و چەکێن خوە رادەست کرنە.
دەم پارتی د داخویانیێن خوە دە ب بەردەوامی تەکەز دکە کو رۆلا عەڤدللا ئۆجالان د ئاراستەکرنا چارەسەریا سیاسی و پێڤاژۆیا ئاشتیێ دە خوەدی گرینگیەکە سەرەکی یە.
