مەزلووم عهبدی ل سەر حەسابێ خوەیێ فەرمی یێ تۆرا جڤاکی یا Xێ دەربارێ بوویەرێ دە داخویانیەک بەلاڤ کر و ھەڤخەمییا خوە ئانی زمان: “ب خەم و کۆڤانەکە کوور، نووچەیا شەھیدبوونا 9 قوربانیێن کۆبانیێ یێن کو د بوویەرا ئالۆزییا زیندانا باژێر دە جانێ خوە ژ دەست دان رادگھینم. ئەز ژ دل سەرساخیێ ژ بۆ مالباتێن وان و ھەموو خەلکێ کۆبانیێ دخوازم و ژ بۆ برینداران ژی داخوازا باشبوونەکە لەزگین دکم”.
عهبدی دەربارێ رێکارێن یاسایی دە تەکەز کر کو ژ ئالیێ ئالیێن پێوەندیدار ڤە لێپرسینەکە بەرفرەھ و زەلال ژ بۆ دەرخستنا راستیا بوویەرێ دەست پێ کریە و گۆت: “ژ بۆ حەسابپرسینێ لگەل وان کەسێن کو د ڤێ بوویەرێ دە کێمخەمی و خەمساری کرنە، لێکۆلین ددۆمە و دێ ئەنجامێن لێپرسینێ ب ئاوایەکی شەفاف ژ رایا گشتی رە بێن راگھاندن”.
د بەشەکە دن یا پەیاما خوە دە، مەزلووم عهبدی دەستنیشان کر کو ژ بۆ رێگرتنا ل دوبارەبوونا کارەساتێن ب ڤی رەنگی، دڤێ رۆلا سازیێن دادوەری و ئەولەھیێ بێ بھێزکرن و گۆت: “پێویستە ھەڤاھەنگیا د ناڤبەرا سازیێن دادوەری و ئەولەھیێ دە بێ خورتکرن، ب رەنگەکی کو سەروەرییا قانوونێ بێ مسۆگەرکرن، مافێن سڤیلان و گرتیان بێن پاراستن، و ئەولەھی و ئارامیا باژارێ کۆبانیێ بێ پاراستن”.
چ قەومیبوو؟
چرووسکا سەرەکەیا ڤان ئالۆزییان شەڤا پێنجشەمێ، 10ی ئیلۆنا 2026ێ دەست پێ کر؛ دەما کو جوانەکی ب ناڤێ سیپان حزنی (ئەندامێ لیوایەکە ئارتێشا سووریەیێ و شەرڤانێ بەرێ یێ ھێزێن سووریەیا دەمۆکراتیک – ههسهدێ) ژ ئالیێ چەند کەسان ڤە ب ئاوایەکی ھۆڤانە ھات کوشتن و سەرێ وی ھات ژێکرن. پشترە تەرمێ وی رادەستی مالباتا وی ھات کرن.
شەھیدکرنا سیپان حزنی بوو سەدەما دەستپێکرنا پێلەکە بەرفرەھا نەرازیبوون و خوەپێشاندانێن خەلکێ ل کۆبانی، قامشلۆ و پرانیا باژارێن دن یێن رۆژئاڤایێ کوردستانێ.
ل باژارێ کۆبانیێ، ھەولدانا ھێزێن ئەولەھیێ یا ژ بۆ بەلاڤکرنا خوەپێشاندەران بوو سەدەما دەرکەتنا گرژی و پەڤچوونان. ل پەی ڤێ یەکێ، ژ بۆ دەرکەتن و کەتنا ناڤ باژارێ کۆبانیێ قەدەغەیا چوونووھاتنێ ھات راگھاندن، ھێزەکە مەزن یا ئەولەھیێ بەر ب ناڤا باژێر ڤە ھات شاندن و دەست ب پێلەکە گرتنا جوانێن نەرازی ھات کرن و ئەو خستن گرتیگەھێ.
راگەشی دەردۆرا ساەت 2:00ی بەربانگێ گھیشت لووتکەیێ؛ دەما کو ھێزێن ئەولەھیێ بریار دا بەشەک ژ جوانێن دەستەسەرکری بەر ب زیندانێن باژارێ حەلەبێ ڤە ڤەگوھێزن. گرتیان ب توندی ل دژی ڤێ بریارێ نەرازیبوون نیشان دان و د ناڤا گرتیگەھێ دە ئالۆزی دەرکەت.
