مالباتا شەرڤان سامی شێخمووس حەسۆ، کو ب ناڤێ سیپان حەسەکێ تێ ناسین، ل سەر بوویەرا رەڤاندن و شەھیدخستنا وی داخویانیەکا فەرمی دا رایا گشتی. مالباتێ بانگ ل ھەموو ئالیێن پێوەندیدار کر کو ژ بۆ زەلالکرنا راستیا ڤێ تاوانێ دادگەھەکا عادل بهێت مەشاندن و دادپەروەری پێک بهێت.
د داخویانیێ دە ھات دەستنیشانکرن کو سیپان د دەما ب جھ ئانینا ئەرکێ خوەیێ لەشکەری دە ھاتیە ئارمانجگرتن. مالباتێ بال کشاند سەر وێ یەکێ کو ئەرکێ لەشکەرەکی پاراستنا ئەولەھی و ئارامیا جڤاکێیە و گۆت: “ھەر بوویەرەکا کو د دەما کار دە روو بدە، دڤێت تەنێ د چارچۆڤەیا قانوون و دادگەھان دە بێتە نرخاندن. نابە کو لەشکەر ل دەرڤەیی قانوونێ ببن ئارمانجا تۆلھلدانێ.”
مالباتا سیپان حەسەکێ ئەو بانگەشە ژی رەد کرن کو شەھیدخستنا کورێ وان د بن ناڤێ “تۆلھلدانا عەشیری” دە دهێت مەشاندن. د داخویانیێ دە ھات دیار کرن کو ئەگەر ل سەر دەما خزمەتا وی ناکۆکیەک ھەبە ژی رێیا دادگەھێ ڤەکری بوو، لێ رەڤاندنا مرۆڤەکی ژ مالا وی و کوشتنا وی تاوانەکا ئەشکەرەیە و ب چ ئاوایی نابە کو وەکی تۆلھلدانەکا رەوا بێتە نیشاندان.
ل سەر ئالیێ جڤاکی و عەشیری ژی مالباتێ دیار کر کو ئەو تاوانێ ناخن ستوویێ چ نەتەوە یان عەشیرەکێ. بەرپرسیاری تەنێ دکەڤە سەر ملێ وان کەسێن کو ئەڤ تاوانە کرنە، تێ دە بەشدار بوونە یان ژی رێ دایە. وەکی دن، مالباتێ تەکەز کر کو ئەو ژ بۆ کەسی داخوازا تۆلھلدانێ ناکن دا کو مرۆڤەکی دن نەبە قوربانیێ بوویەرێن ب ڤێ ئاوایی.
