نڤیسینگەھا عەفرینێ یا دەزگەھا خێرخوازییا بارزانی ب ھەڤاھەنگییا ل گەل رێڤەبەریا ھەرێما عەفرینێ، زێدەتری 400 سەلکێن خوارنێ ل سەر کارکەرێن شارەداریێ و خەباتکارێن پاقژیێ یێن ل ناڤا باژارێ عهفرینێ و ناحیەیێن سەر ب وێ ڤە بەلاڤ کر.
رێڤەبەرا نڤیسینگەھا دەزگەھا خێرخوازییا بارزانی ل عهفرینێ، زەینەب شێخ حەیدەر راگھاند، ئەڤ دەستپێشخەری د چارچۆڤەیا ھەڤکاریێ دە و وەک رێزگرتن، سپاسداری و پشتەڤانیەکە ژ بۆ کەد و وەستانا ڤان کارمەند و کارکەران پێک ھاتییە کو ژ بۆ پاقژی و خزمەتا دەڤەرێ دخەبتن.
زەینەب شێخ حەیدەر دیار کر کو ئالیکاری و پشتەڤانییا وان ژ بۆ ڤێ چینا کەدکار و ھەموو خەلکێ ھەرێمێ دێ بەردەوام بە و گۆت: “ئەم نھا ل ناڤا باژارێ جندرێسێ نە. مە سەلکێن خوارنێ ژ بۆ کارکەرێن پاقژکرنێ ئانینە. ئارمانجا مە ئەوە کو ئەم پشتگرییا ڤان کارکەران بکن و ل ھەمبەر کەدا وان یا ھێژا، سپاسیا وان بکن.”
