دەستھلاتدارێن فەرمی یێن سووریەیێ راگھاندن کو ژ بەر تەقینا مەخزەنەکا چەک و جەبلخانەیێ ل پێگەھەکا لەشکەری یا ئارتێشا سووریەیێ کو دکەڤیتە نێزیکی گوندێ عەیاشێ یێ ل رۆژئاڤایێ دێرەزۆرێ، ھەری کێم 6 لەشکەران جانێ خوە ژ دەست دایە و 9 کەسێن دن ژی بریندار بوونە.
پارێزگارێ دێرەزۆرێ د داخویانیەکە چاپەمەنیێ دە دیار کر کو بوویەر شەڤا بۆری قەومیە و پشتی تەقینێ تیمێن رزگارکرنێ یەکسەر گەھشتنە جھێ بوویەرێ. پارێزگار دا زانین کو ھەتا نھا تەرمێ 6 کەسان ھاتیە دیتن، لێ تیمێن پسپۆر ژ بۆ دیتنا کەسێن وندا بوویی خەباتێن خوەیێن لێگەرین و رزگارکرنێ بێ راوەستان ددۆمینن.
د بەردەوامیا داخویانیێ دە ھات دەستنیشانکرن کو ھەموو تەدبیرێن پێویست یێن ئەولەھیێ ھاتنە وەرگرتن و ژ بۆ رۆنیکرنا سەدەم و ھوورگلیێن ڤێ تەقینێ لێپرسینەکە بەرفرەھ و بلەز د ناڤبەرا سازیێن پێوەندیدار دە ھاتیە دەستپێکرن.
ژ ئالیێ خوە ڤە، رێڤەبەریا راگھاندن و پێوەندیان یا وەزارەتا بەرڤانیێ یا سووریەیێ ب داخویانیەکا فەرمی بوویەر پشتراست کر. وەزارەتێ راگھاند کو تەقین ل یەک ژ ناڤەندێن وان یێن لەشکەری یێن ل ھەرێما عەیاشێ روو دایە و لێکۆلینێن ژ بۆ دیارکرنا سەدەما سەرەکی یا تەقینێ و تەخمینکرنا قەبارەیێ زرارێن گیانی و مادی هێژ ژی بەردەوام دکن.
