سەرۆکوەزیرێ ھەرێما کوردستانێ مەسروور بارزانی، ب فەرمی زەنگلا دەستپێکا سالا نوویا پەروەردەیێ یا 2026-2027ێ لێخست و پابەندبوونا حکوومەتا ھەرێما کوردستانێ یا ژ بۆ پشتەڤانیا بەردەواما مامۆستە و خوەندەکاران نوو کر.
سەرۆکوەزیر مەسروور بارزانی ئیرۆ 20ێ ئیلۆنا 2026ێ، ب تەڤلیبوونا وەزیرێ پەروەردەیێ در. ئالان حەمە سەعید، سەردانا دبستانا “گلۆبال”یا ل باژارێ ھەولێرێ کر. سەرۆکوەزیر ل ور ب لێخستنا زەنگلێ سالا خوەندنێ ڤەکر و د گۆتارەکێ دە پیرۆزباھی ل ھەموو خوەندەکار و مامۆستەیێن کوردستانێ کر.
مەسروور بارزانی د گۆتارا خوە دە تەکەز کر کو حکوومەت دێ ھەموو دەرفەتان ژ بۆ پێشخستنا کەرتا پەروەردەیێ ب کار بینە و بانگ ل خوەندەکاران کر کو گرینگیەکە تایبەت بدن پەروەردەیا خوە. سەرۆکوەزیر ژ خوەندەکاران خوەست کو بەری ھەر تشتی ببن خوەدی نرخێن مرۆڤدۆستی و ژینگەھدۆستیێ.
د بەردەوامیا ئاخافتنا خوە دە، سەرۆکوەزیر بارزانی بال کشاند سەر قەھرەمانیا پێشمەرگەیان و تەکۆشینا شەھیدان و گۆت: “ئەڤ وەلات بەرھەما خوینا شەھیدێن مە و کەدا پێشمەرگەیێن قەھرەمانە. ژ بەر ڤێ یەکێ، رێزگرتنا ل نشتمان و پیرۆزییێن وێ ئەرکا ھەر وەلاتییەکێ یە.”
د داویێ دە، سەرۆکوەزیرێ ھەرێما کوردستانێ سپاسیەکە تایبەت ئاراستەیی مامۆستەیان کر ژ بەر خوەراگری و خەباتا وان یا د شەرت و مەرجێن دژوار دە و دەستنیشان کر کو ب کەدا وان چ جاران پرۆسەیا پەروەردەیێ ل ھەرێما کوردستانێ نەسراوەستیایە.
