ب سەدان خوەندەکار، مامۆستە و مالباتێن وان ل باژارێ قامشلۆیێ یێ رۆژئاڤایێ کوردستانێ داکەتن قادان و نەرازیبوونا خوە ل ھەمبەر بریارا وەزارەتا پەروەردەیێ یا سووریەیێ نیشان دان. بەشداران داخواز کر کو زمانێ کوردی ببیتە زمانەکی فەرمی و سیستەما پەروەردەیێ یا تەمامی ب زمانێ دایکێ بێتە پەژراندن.
خوەپێشاندان ئیرۆ 22یێ ئیلۆنا 2026ێ ل یاریگەھا شەھیدێن 12ێ ئادارێ یا ل قامشلۆیێ دەست پێ کر. بەشداران ب ھلگرتنا درووشما “زمانێ مە، ناسنامەیا مەیە”، ھەلوەستا خوە یا ل دژی بریارا داوی یا شامێ ئانین زمان کو خوەندنا زمانێ کوردی تەنێ ب سێ وانەیێن ھەفتەیی سینۆردار کریە.
د خوەپێشاندانێ دە دایکێن خوەندەکاران تەکەز کرن کو فێربوون و خوەندنا ب زمانێ دایکێ مافەکی بنگەھینە و دڤێت ئەڤ ماف د دەستوورا نوو یا وەلات دە جیھ بگرە. دایکەکێ دیار کر کو زارۆکێن وان ب سالانە ب زمانێ کوردی پەروەردەیێ دبینن و گۆت: “پشتی کو زارۆکێن مە ھەتا ئاستێن بلند ب کوردی خوەندنە، ئێدی نە هێسانە کو پەروەردەیا ب تەمامی ب عەرەبی ل سەر وان بێتە فەرزکرن.”
خوەندەکارێن بەشداری چالاکیێ بوونە ژی دان زانین کو ئەو نە ل دژی زمانێ عەرەبی نە، لێ داخوازا وان ئەوە کو ھەموو بابەتێن زانستی و پەروەردەیی ب کوردی بهێن دایین. خوەندەکاران بال کشاند سەر وێ یەکێ کو پشتی 11 سالان پەروەردەیا ب کوردی، دەرباسبوونا راستەراستا بۆ سیستەما ب عەرەبی دێ ببە ئاستەنگیەکە مەزن د رێیا پێشەرۆژا وان یا ئەکادمیک دە.
ئەڤ کارڤەدانا گەل پشتی داخویانیا وەزیرێ پەروەردەیێ یێ سووریەیێ محەمەد عەبدولرەحمان تورکۆ ھات، کو راگھاندبوو ل گۆری فەرمانا ھەژمار 13 یا سالا 2026ێ، زمانێ کوردی وەک “زمانەکی نشتمانی” تێ ناسکرن و تەنێ ھەفتانە ب رێژەیا 3 وانەیان ل دبستانێن دەڤەرێن کوردی تێ دایین.
لێ بەلێ، خەلکێ ھەرێمێ، رێخستنێن سڤیل و خوەندەکار ڤێ پێنگاڤا شامێ پر کێم دبینن و داخواز دکن کو سیستەما پەروەردەیێ یا تەمامی ب کوردی بێتە پاراستن و پەژراندن.
