ئەندامێ ئاکادەمیا زانستێن جڤاکی یا عەبدوللاھ ئۆجالان، دوران کالکان د بەرنامەیەکا تایبەتا تەلەڤیزیۆنا «مەدیا خەبەرێ» دە نرخاندنێن گرینگ ل سەر پێڤاژۆیا سیاسی یا ل ترکیەیێ، رەوشا رۆژئاڤایێ کوردستانێ و گەشەدانێن ل رۆژھلاتا ناڤین کرن. کالکان دەستنیشان کر کو ژ بۆ بپێشڤەبرنا پێڤاژۆیا ئاشتیێ و جڤاکا دەمۆکراتیک، دڤێت دەولەت نێزیکاتیا خوەیا کەڤن بگوھەرینە و گاڤێن رەوایێن سیاسی و قانوونی باڤێژە.
دوران کالکان بال کشاند سەر “یاسایا چارچۆڤەیێ” کو بەری 40 رۆژان ھاتبوو دەرخستن و دیار کر کو تەڤی کو ڤێ یاسایێ د دەستپێکێ دە ھێڤیەکە مەزن چێکربوو ژی، ھەتا نھا ژ ئالیێ دەولەتێ ڤە ت گاڤێن بەربچاڤ نەھاتنە ئاڤێتن. کالکان گۆت: “یاسا ھەما ھەما ژ بۆ کو نەیێ بکارئانین ھاتیە دەرخستن.” وی ئانی زمان کو سینۆردارکرنا پێڤاژۆیێ یا تەنێ ب مژارا “بێچەکرنێ” رە دێ ببە سەدەما ختماندنا رێیێن چارەسەریێ و تەکەز کر کو پەکەکەیێ ستراتەژیا خوە گوھەرتیە و دخوازە سیاسەتا دەمۆکراتیک ب پێش بخە.
کالکان دەستنیشان کر کو چارەسەریا بنگەھین یا پرسگرێکا کورد د ناڤ سیستەما سیاسی دە ممکونە، ب مەرجێ کو کورد ب ناسنامە، زمان و چاندا خوە وەرن پەژراندن. وی تەکەز کر کو “دەرمانێ یەکانە”یێ ژ بۆ پاشەرۆژا وەلات، دەمۆکراتیکبوونا ترکیەیێ یە کو ئەو ژی ل سەر بنگەھا ئازادیا گەلێ کورد ئاڤا دبە.
د بەشەکە دن یا ئاخافتنا خوە دە، کالکان بال کشاند سەر روودانێن داوی یێن ل رۆژئاڤایێ کوردستانێ، کوشتنا شەرڤانێ کورد سیپان حزنی و پشترە شاندنا ھێزێن لەشکەری ژ حەلەبێ بەر ب کۆبانیێ ڤە “پرۆڤۆکاسیۆنەکە پر مەترسیدار” پێناسە کر و بەرتەکا گەلێ کۆبانیێ ژی وەکی مافەکی رەوا و دەمۆکراتیک نرخاند.
کالکان رەدکرنا پەروەردەیا ب کوردی شەرمەزار کر و ئانی زمان کو ناسکرن و پاراستنا مافێ خوەندنا ب زمانێ دایکێ مەرجێ سەرەکی یێ ئیرادەیا جڤاکییە.
ل سەر رەوشا ئیران و رۆژھلاتێ کوردستانێ ژی کالکان دیار کر کو رەوشپارێزییآ کەڤنار یا ل ئیرانێ نەما دکارە بمەشە و چارەسەریا داوی تەنێ ب ریا ئازادیا جڤاکی و دەمۆکراسیێ پێکانە.
