ئەنجوومەنا نشتمانییا کوردی ل سووریێ (ئهنهكهسێ)، ب داخویانیەکێ پێشوازی ل تەمامبوونا پرۆسەیا یەککرن و برێخستنکرنا ھێزێن پێشمەرگە ل ژێر سیوانا وەزارەتا پێشمەرگە کر و ئەڤ گاڤ وەکە دەستکەفت و پێشڤەچوونەکە سازیییا گرنگ ب ناڤ کر.
سەکرەتاریا گشتییا ئهنهكهسێ د داخویانیا خوە دە راگھاند، ئەو ب گەرمی پیرۆزباھیێ ل راگھاندنا فەرمییا یەککرنا ھێزێن پێشمەرگە دکن، کو رۆژا دوشەمێ، 21ێ ئیلۆنا 2026ان، د مەراسیمەکە فەرمی دە ل بارەگەھا سەرۆکاتیا ھەرێما کوردستانێ ھاتبوو ئەنجامدان.
ئهنهكهسێ بال کشاند سەر گرنگیا ڤێ پێنگاڤێ و دەستنیشان کر کو ئەڤ گاڤ: یەکیتیا بریاردانێ خورت دکە، لێڤەگەرا ئەولەھی و لەشکەری دکە یەک، دەستکەفتێن ھەرێمێ دپارێزە و پێگەھا وێ یا دەستووری د چارچۆڤەیا ئیراقا فەدەرال و دەمۆکراتیک دە بھێزتر دکە.
د داخویانیێ دە ھەر وھا ئاماژە ب قوربانیدان و دیرۆکا تێکۆشینا پێشمەرگە ھات کرن و ھات گۆتن: تێکۆشین و قوربانیێن پێشمەرگە د پاراستنا گەلێ کوردستانێ دە ل سەر ھەموو ئاستان؛ ل دژی ئەنفال، چەکێن کیمیەوی، جینۆساید و تەرۆرێ، بەشەکە کوور و ماییندەیە ژ دیرۆکا گەلێ کوردستانێ و دەستکەفت و مافێن کو ھاتنە بدەستخستن.
ئهنهكهسێ ھەموو ھەولێن کو بوونە سەدەما سەرخستنا ڤێ پێنگاڤێ بلند نرخاندن و ب تایبەتی پێزانینێن خوە ژ بۆ رۆلا سەرۆک مەسعوود بارزانی، سەرۆکاتیا ھەرێما کوردستانێ و پارتیێن سیاسی یێن کوردستانی نیشان دا، کو د برێڤەبرنا ڤی کاروانی و راکرنا ئاستەنگیان دە خوەدی رۆلەکە یەکئالیکەر بوون.
ل گۆری داخویانیێ، یەککرنا ھێزێن پێشمەرگە وەکە بەرسڤەکێ یە ژ بۆ داخواز و ھێڤیێن گەلێ کوردستانێ و بانگێن دوبارە یێن دۆست و ھەڤپەیمانان، ھەروھا د بن سیا ئالۆزیێن دەڤەرێ دە ژی، بنگەھەکی سەرەکەیە ژ بۆ بھێزکرنا ئارامیا ھەرێما کوردستانێ.
د داوییا داخویانیێ دە ھات تەکەزکرن کو گرینگیا ڤێ دەستکەفتێ د وێ یەکێ دەیە کو ببە بنگەھەک ژ بۆ تەمامکرنا سازیبوونێ و یەکخستنا بریارا سیاسی، ئەولەھی و لەشکەرییا ھەرێما کوردستانێ، دا کو دەستکەفت و یەکیتیا ھەرێمێ بێنە پاراستن و شیانا وێیا رووبرووبوونا ئاستەنگیان خورتتر ببە.
