خۆ گۆتن ژی پێدڤی ب ڕوونکرنێ هەیە. فائق ئێزیدى ل سەر شاشەیێ بهحسێ«دەهان» گرتیێن داعش دكهت ل ههولێر و دهوكێ كو هاتینه بهردان و دیار دكهت كو نێزیكى 260 كهسانه، خەلکى مافێ ههى بزانن فائق ئێزیدى پشتا خۆ ب کیژ ژمارەیێ گرێ ددەت، زانیارییا وی ژ کیڤه هاتیە و بەلگەیێن وی چنە.
پێگەها سیاسی و ڕاگەهاندنا فائق ئێزیدى ژی دڤێت دیڤچون بو بهێته كرن . فائق ئێزیدى د ساڵێن بۆری دا وەک ئەندامێ ئێکەتییا نیشتمانی یا کوردستانێ هاتیە نیاسین، بابەت ب ناڤێ وی ل PUKmedia هاتینە بڵاڤکرن و وی بەرنامەیەک ل کەنالا ئەلمسرى پێشکێش کریە كو كهنالهكێ ئهلكترونى بوو ب زمانێ عهرهبى ل سلێمانیێ دهاته پهخشكرن.
ل ڤێرێ پرسەکا دی هەیە: تۆمەت ل سەر «حکوومەتا هەرێمێ» دهێتە دانان، لێ ئێکەتی نیشتمانی ژی د ڤێ حکوومەتێ دا پشکدارە و قوباد تاڵەبانی جێگرێ سەرۆکێ حکوومەتێیە. ئەگەر فائق ئێزیدى دەزگەهەکێ حكوومهتا كوردستانێ یان بەرپرسەکێ دیار ئارمانج بکەت، دڤێت ناڤێ وی بێژیت. دەمێ ناڤێ حکوومەتێ ب گشتی دهێتە بکارئینان، تۆمەت بەرفرەهتر دبیت و ڕێیا زانینا ڕاستیێ تەنگترلێ دهێت .
شاشەیا ئای نیوز ژی د ڤێ بابەتێ دا بەرپرسیاری هەیە. ڤەکۆلینێن بهڵاڤکری یێن وێ، پەیوەندیەکێ د ناڤبەرا بڕێڤەبرنا کەنالێ و کتائب سید الشهداء دا دیار دکەن و د هەندەک ناڤنیشانێن وێ دا ڕەخنەیێن توند ل پارتی دهێنە دیتن. پرسا گرنگتر ئەوە: ئەرێ ڤی کەنالی ژ مێڤانێ خۆ بەڵگە خواست؟ ئەرێ دەرفەتا بەرسڤێ دا لایەنێ تۆمەت ل سەر هاتیە دانان؟
ل پردێ کارەکێ ئەمنی دژی گومانلێکریێن داعش ڕوو دایە. لێ ئەو ڕوویدانە ب تنێ ناسەلمینیت کو ئەو کەس ژ زیندانێن هەولێر و دهۆکێ هاتینە بەردان. د ناڤبەرا ڕوویدانێ و گۆتنا ئێزیدی دا بازنهكا بهرزهكرى ههیه. بانگەشا فائق ئێزیدى ژ ڤێ بۆشاییێ هێزێ وەردگریت، لێ بتنێ ڤهکۆلینێن ئهمنى دشێن وێ بۆشاییێ ب ناڤ، تۆمار و بەڵگەیان پڕ بکەن نهك كهسهكێ مینا فائق ئێزیدى.
ژبەر هندێ، دڤێت حکوومەتا هەرێمێ ژ فائق ئێزیدى بخوازیت زانیاریێن خۆ بگەهینیتە دەزگەهێن ئەولەهیێ. ئەگەر وى كارى نهكهت، پێدڤی یه دادگەهـ ل گۆر یاسایێ بڕیارا بانگکرنا وی بدەت. دڤێت قوباد تەلەبانی ژی وەک جێگرێ سەرۆکێ حکوومەتێ و کەسایەتیەکێ دیار یێ ئێکەتیێ، داخوازا ڕوهنكرنا ڤێ بابەتێ ژ فائق ئێزیدى بکەت، ئهگهر قوباد تەلەبانی ڤى كارى نهكەت زورا گرنگه وهزارهتا ناڤخوە یا كوردستانێ داخویانیهكا بلهز بدهت و پێرابونێن یاسایى لسهر فائق ئێزیدى ئهنجام بدهت و نوینهراتیا ئهنجومهنێ وهزیران یا حكوومهتا ههرێما كوردستانێ ل بهغدا سكالایێ لسهر تهلهفزیونا ئاى نیوز تومار بكهت. مەبەست بێدەنگکرنا ئێزیدی نینە، مەبەست ئەوە کو گۆتنەکا ب ڤێ شێوەی نابیت بمینته ل سەر شاشهیهكێ و بێى کو لێپرسین بۆ بهێته كرن.
خەلک ژ شاشەیێ ترسێ وەردگرن، لێ ژ ههبوونا بەڵگەی ڕاستیێ دزانن. پرسا کو نوكه دڤێت بەرسڤا وێ بهێتە دان ئەڤهیە: ب ڕاستی چ ڕوو دایە؟
