شێورمەندێ سەرۆکاتیا کۆمارا سووریەیێ مەزلووم عەبدی د پەیامەکا ڤیدیۆیی دە داخواز ژ خوەندکار و مالباتێن ل رۆژئاڤایێ کوردستانێ کر کو بەردەوامیێ بدن پرۆسەیا خوەندنێ یا سالا نوو. عەبدی بانگ ل مالباتان کر کو زارۆکێن خوە بشینن دبستانێن بنگەھین یێن کوردی و سۆز دا کو داکو زمانێ کوردی ب ئاوایەکی فەرمی د سیستەما پەروەردەیا سووریەیێ دە بێتە جیگرکرن، دێ ھەولدانێن خوە زێدەتر بکن.
شێورمەندێ سەرۆکاتیا کۆمارێ مەزلووم عەبدی ئیرۆ سێشەمێ، 29ێ ئیلۆنا 2026ێ، د پەیاما خوە دە پشتەڤانیا خوە ژ بۆ خوەندەکاران نیشان دا و تەکەزی ل سەر گرنگیا زمانێ دایکێ کر. عەبدی راگھاند کو زمانێ کوردی ناسنامەیا گەلێ کوردە و پاراستنا وی ئارمانجا بنگەھین یا تێکۆشینا وان بوویە. وی دەستنیشان کر کو پەروەردەیا ب زمانێ دایکێ مافەکی خوەزایی و نەگوھەرێ ھەموو گەلانە.
عەبدی بال کشاند سەر دەستکەفتیێن 14 سالێن بۆری یێن ل رۆژئاڤایێ کوردستانێ و پەسنا وان مالبات و مامۆستەیان کر کو د ناڤ شەرت و مەرجێن گران یێن شەری دە سیستەمەکێ پەروەردەیێ یێ دیرۆکی دامەزراندنە. وی دا زانین کو پشتی گوھەرینێن سیاسی یێن داوی و ھەرفینا رێژیما بەرێ، د ھەیامێ سالەک و ھەشت مەھێن بۆری دە ژ بۆ فەرمیکرنا زمانێ کوردی نیقاش و جڤینێن گرینگ ھاتنە ئەنجامدان.
دەربارێ بریارا داوی یا وەزارەتا پەروەردەیێ دە، عەبدی دیار کر کو نەرازیبوون و ھەلوەستا خوەندکار و مالباتێن وان ل بەرامبەری ڤێ بریارێ مافەکی رەوایە. لێ بەلێ وی تەکەز کر کو ژ بەر دەستپێکرنا سالا خوەندنێ و قۆناغا ڤەگوھێز، گرینگە پرۆسەیا پەروەردەیێ رانەوەستە و زارۆکێن وان ژ خوەندنێ بێپار نەمینن.
د داویا پەیاما خوە دە، مەزلووم عەبدی پشتراستی دا مالباتان کو رێکارێن پێویست ھاتنە گرتن دا کو ئاستەنگیێن ل بەرامبەری خوەندەکارێن ب کوردی خوەندنە راببن. وی دیار کر کو ئارمانج ئەوە خوەندەکار ژ ئالیەکی ڤە فێری زمانێ عەرەبی ببن و ژ ئالیێ دن ڤە ژی زمانێ کوردی بپارێزن، دا کو د سالا بێ دە گاڤێن مەزنتر ژ بۆ مسۆگەرکرنا ھەموو مافێن زمانی بهێن ھاڤێتن.
