ھێزێن ئیرانێ شڤانەکی کورد کوشت

ل گۆری رێخستنا مافێن مرۆڤانا ھەنگاوێ کو ناڤەندا وێ ل ئۆسلۆیێ یە، ئارتێشا پاسداران یا ئیرانێ ل پارێزگەھا کرمانشانێ شڤانەکی کورد ب گوللـەیان کوشتییە.

ھەنگاوێ راگھاند کو نایب کەریمی یێ 25 سالی، دەما کو ل ھەرێما چیایی یا ناڤچەیا سەلاس و باواجانیێ یا کرمانشانێ پەزێن خوە دچەراند، ژ ئالیێ پاسدارێن ئیرانێ ڤە ھاتییە گوللـەبارانکرن و جانێ خوە ژ دەست دایە.

ئەڤ بوویەر پشتی ھەفتەیەکێ کو ھێزێن ئەولەھیێ یێن ئیرانێ کۆلبەرێکی کورد ل ھەمان ھەرێمێ کوشتبوو، قەومی.

ل گۆری ھەنگاوێ، کۆلبەرێ کورد محەمەد سدق ئەوالی یێ 28 سالی، 23ێ ئیلۆنێ ل ھەرێما شێخ سالحێ کو گرێدایی ناڤچەیا سەلاس و باواجانیێ یە، ژ ئالیێ ھێزێن ئیرانێ ڤە ب گوللـەیان ھاتییە کوشتن.