سەرۆکێ پارتیا بزاڤا نەتەوەیی (مەھەپێ) دەولەت باخچەلی بانگ کر کو دڤێت سەرۆککۆمارێ ترکیەیێ رەجەب تەییب ئەردۆگان د ھلبژارتنێن پاشەرۆژێ دە جارەکا دن ببیتە بەربژێر. باخچەلی تەکەز کر کو ژ بۆ ڤەکرنا رێیا بەربژێربوونا ئەردۆگان، دڤێت پارلامەنا ترکیەیێ بریارا نووکرنا ھلبژارتنان بدە و پرۆسە د سالا 2028ێ دە پێک بێ.
دەولەت باخچەلی د جڤینا ھەفتانە یا فراکسیۆنا پارتیا خوە دە ل پارلامەنا ترکیەیێ ئاخڤی و بەحسا رۆژەڤا سیاسی یا وەلات کر. وی دیار کر کو د ڤێ قۆناغا گرنگ دە تەجرووبە و ئیرادەیا ئەردۆگان ژ بۆ پاشەرۆژا ترکیەیێ گەلەکی گرینگە و گۆت: “د رێیا ئاڤاکرنا ‘ترکیەیەکە بێ تەرۆر و ھەرێمەکە بێ تەرۆر’ دە، پێدڤیا مە ب گوھەرینا ئاراستەیێ نینە؛ بەلکی دڤێت ئەڤ رەوشا ھەیی ب ھەمان ئاوایی بێتە برێڤەبرن.”
لیدەرێ مەھەپێ دەستنیشان کر کو بەردەوامیا ئەردۆگان د پۆستا سەرۆککۆماریێ دە دێ د بەرژەوەندیا ترکیەیێ و ھەموو ھەرێمێ دە بە. وی دیار کر کو بەربژێربوون و سەرکەفتنا ئەردۆگان داخوازا وان یا سەرەکی یە دا کو سەقامگریا سیاسی یا وەلاتی بپارێزە.
د داویا داخویانیا خوە دە، باخچەلی جارەکە دن بال کشاند سەر رۆلا پارلامەنتۆیێ و گۆت کو ژ بۆ ژ ھۆلێ راکرنا نەدیاریێن سیاسی و مسۆگەرکرنا بەردەوامیا گەشەپێدانا وەلات، بریارا ھەری راست ئەوە کو پارلامەنتۆ بریارا نووکرنا ھلبژارتنان بدە و وەلات د سالا 2028ێ دە بەر ب سندۆقان ڤە بچە.
