2 سال د سەر پێڤاژۆیێ رە دەرباز بوون: ھین ژی ناڤێ پێڤاژۆیێ یەکئالی نەبوویە
دو سال د سەر دەستپێکرنا پێڤاژۆیا چارەسەریێ رە دەرباز بوون لێ ھین ژی مژارا ناڤێ وێ پێڤاژۆیێ یەکئالی نەبوویە، کو پارەک ژ ئاکادەمیسیەنان دبێژن کو ئەڤ پێڤاژۆ نە پێڤاژۆیا چارەسەریا پرسا کوردانە و بۆ ئارمانجەک دن دەست پێ کریە، پارەک ژ سیاسەتمەداران ژی بالێ دکێشن سەر وێ یەکێ کو ھین ژی ئالیێن پێڤاژۆیێ نەگھشتنە لھەڤکرنەکە گشتگر و تێ گۆتن کو پێڤاژۆ د قۆناغەکە گەلەک ھەستیار دە یە و دڤێ ھەمی ئالی بالدار بن.
د جۆتمەھا سالا 2024ێ دە ب بانگا سەرۆکێ مه‌هه‌پێ دەڤلەت باھچەلی پێڤاژۆیەک نوو دەست پێ کربوو، کو ئالیێ دەولەت و دەستھلاتێ ناڤێ ترکیەیا بێتەرۆر ل پێڤاژۆیێ کرن و دەم پارتیێ ب ھەڤدیتنێن رێبەرێ په‌كه‌كێ عه‌بدوللا ئۆجالان ڤە گرێدایی ژ پێڤاژۆیێ رە ئاڤاکرنا جڤاکا دەمۆکراتیک گۆتن.
ھەر چقاس ھەتا نھا رێورەسمەک چەکشەوتاندنێ ھاتبە کرن، کۆمیسیۆنەک ھاتبە ئاڤاکرن و یاسایەک ھاتنە دەرخستن ژی پارەک ژ ئاکادەمیسیەنان بالێ دکێشن سەر وێ یەکێ کو پێڤاژۆ ژ بۆ ئارمانجەک جودا تێ مەشاندن.
ئاکادەمیسیەنێ پشکا زانستێن سیاسییێ زانینگەھا دیجلەیێ ڤەدات کۆچال د ڤی واری دە گۆت: “پێڤاژۆ ژ بۆ گوھەرینا رەژیمێ تێ بکارئانین. نیشانەیا وێ یا ھەری خورت ژی ئەوە کو جارا یەکێیە بجھئانینا یاسایێ ب لژنەیا ئەولەکاریا نەتەوەیی ڤە تێ گرێدان، ئانگۆ سازیا ھاتی ھلبژارتن ب سازیا ھاتی تایینکرن ڤە تێ گرێدان”.
ڤەدات کۆچال ھەروەسا راگھاند: “پێڤاژۆ ل سەر سێ خالان دمەشە، ئۆجالان، باھچەلی و دەم پارتی، ل سەر ڤان سێ خالان ژی وەک بارانێ زانیاری دبارن، دەم پارتی تێ بکارئانین، پارلەمەنتەرێن دەم پارتیێ ژی ژ بۆ کو فەیدەیی ژ دەرفەتێن پارلەمەنتەریێ وەربگرن پێڤاژۆیێ دمەشینن”.
ناڤبۆری تەکەز ژی کر: ترکیە بەر ب میلیتاریزمێ ڤە دچە، ئەز باوەر ناکم په‌كه‌كه ڤەگەره، ژ خوە په‌كه‌كێ چەک بەرنەدایە، تشتەک ب ناڤێ چارەسەریا پرسا کوردان ژی خویا ناکە، بەحسا زمان ژی ناکن، بەحسا ناسنامەیێ ژی ناکن”.
سیاسەتمەدارێن کورد ژی د دەرھەقا پێڤاژۆیێ دە دبێژن کو ھێڤیا وان ئەوە ب ئاوایەکی ماییندە چەک ژ ھۆلێ رابن و پرسا کورد چارەسەر ببە، لێ دەما ل پێشھاتێن ھەتا نھا دنھێرن نیشانەیێن خورت ژ بۆ چارەسەریا پرسا کوردان خویا ناکن.
سەرۆکێ پارتیا ئینسان و ئازادی ئاھمەت کایا ژی گۆت: “ئالیێ بپرسگرێکێ ڤێ پێڤاژۆیێ ئەوە کو کوردان ب خوە ژ خوە رە ھێڤی چێ کرن کو ژ خوە دەولەت ژ بۆ پێڤاژۆیێ دبێژە ترکیەیا بێتەرۆر، ئالیەک دبێژە زەبەش ئالیەک دبێژە سێڤ، ئالیێ کورد دبێژە ئاڤاکرنا جڤاکا دەمۆکراتیک، ڤان شەرت و مەرجان چاوا جڤاکا دەمۆکراتیک ئاڤا دبە”.
ئاکادەمیسیەن دبێژن کو دەولەت و دەستھلات ب پێڤاژۆیێ بەرژەوەندیێن خوە دپارێزن، سیاسەتمەدار دبێژن ئالیێ پێڤاژۆیێ، یەک دبێژە ترکیەیا بێتەرۆر یەک دبێژە جڤاکا دەمۆکراتیک و پرسا کوردان پاشگوھ دبە.
