ل گوندەوارێ باژارەکی کۆبانیێ د ئەنجاما تەقینا دو مینێن پاشمایێن شەری دە دو وەلاتی بریندار بوون کو رەوشا تەندورستیێ یا یەکی ژ وان گرانە. بوویەر ل گوندێ قزلی یێ سەر ب ناڤچەیا کۆبانیێ ڤە روو دا.
ل گۆری زانیاریێن ژ ھەرێمێ ھاتنە وەرگرتن، وەلاتیێ ب ناڤێ رەشاد مستەفا حاجی موسلم دەما کو ڤەدگەریا مالێ، مینەک پێ ڤە تەقیا و ب گرانی بریندار بوو. پشتی تەقینا یەکەم، دەما کو یەک ژ خزمێن وی ھەول دا ئالیکاریا وی بکە و وی رزگار بکە، مینەکە دن ب وی ڤە ژی تەقیا و د ئەنجامێ دە ئەو وەلاتی ژی بریندار بوو. ھەر دو بریندار دەملدەست ژ بۆ وەرگرتنا دەرمانکرنێ بۆ نەخوەشخانەیەکا باژارێ کۆبانیێ ھاتن گوھەستن.
تەقینا مین و پاشمایێن نەتەقیایی یێن شەری ل سەرانسەری سووریەیێ و رۆژئاڤایێ کوردستانێ بەردەوام مەترسیەکا مەزن ل سەر ژیان و ئەولەھیا سڤیلان چێدکە. ئەڤ بەرماھی ب تایبەتی د دەما ڤەگوھاستن و چوونووھاتنا ناڤا گوندان دە دبن سەدەما کارەساتێن مرۆڤی.
ل گۆری راپۆرتا ھەری داوی یا رەوانگەھا سووریەیێ بۆ مافێن مرۆڤان (SOHR)، تەنێ د مەھا بۆری دە ل سەرانسەری سووریەیێ ژ بەر تەقینا مین و پاشمایێن شەر، 13 کەسان جانێ خوە ژ دەست دایە کو د ناڤ وان دە 5 زارۆک و 3 ژن ھەبوون؛ ھەر وھا د ھەمان ھەیاما مەھانە دە 17 کەسێن دن ژی بریندار بوونە.
